OEKUSI, 19 Marsu 2026 (TATOLI) – Autoridade Rejiaun Administrativa Espesiál Oekusi Ambeno (RAEOA) liuhusi Diresaun Rejionál Terra Propriedade, notifika ona uma-kain haat, ne’ebé sei kontinua hela iha arredór merkadu Numbei ho prazu loron 30 atu hamamuk ona fatin, hodi fó oportunidade ba Governu atu halo konstrusaun foun ba merkadu Numbei.
Notísia relevante:SEATOU apela ba uma-kain haat iha merkadu Numbei atu hamamuk ona fatin
Diretór Diresun Rejionál Terra Propriedade Oekusi, José Ase Neno Colo, notifikasaun ne’e, bazeia orientasaun husi Sekretáriu Estadu Asuntu Toponímia no Organizasaun Urbana (SEATOU), tanba antes ne’e ekipa konjunta atribui ona notifikasaun liuhusi markasaun ba uma-kain 156 iha merkadu Numbei atu hamamuk fatin, maibé uma-kain haat seidauk koopera.
“Loloos ita halo ona iha fulan-Fevereiru ba uma-kain haat ne’ebé hela iha merkadu Numbei, maibé tanba tempu udan, ita labele halo despezu administrativa iha tempu ne’ebá, maibé daudaun ne’e, ekipa konjunta atribui tan notifikasaun ho prazu loron 30, kuandu la kumpre, sei kooredena ho SEATOU halo despezu administrativu,” nia hateten iha Oekusi, ohin.
Notísia relevante:Uma-kain haat iha merkadu Numbei seidauk sai, Autoridade husu atu koopera
Nia esplika, antes ne’e kompañia halo aterru prepara konstrusaun foun ba merkadu Numbei, ho nia na’in mak Diresaun Rejionál Komérsiu no Indústria, no rekolla dadus rikusoin sira ho uma husi Diresaun Rejionál Infraestrutura (DRI).
“Ami-nia responsabilidade kona-ba rai, tanba rai ne’ebá nia estatutu rai Estadu, la’ós rai privadu, tanba ne’e ami halo koordenasaun serbisu antes ne’e, dadus mós rekolla ona,” nia afirma.
Notísia relevante:Abitante 156 iha merkadu Numbei koopera ho Governu sobu rasik uma-kioske
Rekorde fali katak, antes ne’e, iha loron 11 Marsu 2026, Sekretáriu Estadu Asuntu Toponímia Organizasaun Urbana (SEATOU), Germanu Santa Brites, hasai ona ultimatu ba okupante uma-kain haat sei kontinua hela iha arredór merkadu Numbei, tenke koopera atu hamamuk ona fatin, nune’e Governu halo konstrusaun merkadu foun.
“Ha’u rona informasaun katak uma-kain haat iha merkadu Numbei lakohi sai to’o agora, hateten ba uma-kain haat ne’e, sira-na’in sobu rasik ba, muda rasik ba hamutuk sira seluk iha merkadu provizória kraik ne’e. Antes Prezidente Autoridade konvida mak ha’u mai, ha’u husu aranja kedas exavatór tau besik iha ne’ebá, tanba rai ne’e rai Estadu, labele halo diskriminasaun ba maluk sira seluk, ne’ebé muda tuun ona ba merkadu provizória, maibé uma-haat lakoi koopera,” nia dehan iha salaun administrasaun Numbei.
Maibé, Armindo Pereira nu’udar okupante merkadu Numbei, promete sei koopera maibé Governu presiza kria fatin no buka rai, nune’e família haat ne’e bele muda, tanba rai ne’ebé sira hela ba, dezde tinan-1974 to’o ohin.
“Ita hotu respeita desizaun Estadu maibé, labele haluha mós ami povu ki’ik, tanba rai ne’e ami hela, dezde 1974 to’o agora, ne’ebé rai ne’e la’ós rai Estadu maibé rai privadu, rai eransa dezde ami-nia avó sira hela to’o ami kontinua hela tan iha ne’e, sei Governu presiza karik, buka rai ida fó ba ami ou halo uma ida para ami sai karik hela de’it,” nia hateten.
Notísia relevante:Merkadu Numbei sei konstrui ho verba rihun $76, aterru hahú daudaun ona
Entretantu, iha loron 24 Marsu 2025, ekipa konjunta liderada hosi Sekretáriu Estadu Asuntu Toponímia no Organizasaun Urbana (SEATOU), fó ona xamada atensaun ba vendedór sira-neʼebé halo uma no hela permanente iha merkadu Numbei hamutuk uma-kain 156, atu hamamuk ona fatin iha fulan ida nia laran.
Nune’e uma-kain 152 mak koopera hodi sobu rasik sira-nia uma no hamamuk ona fatin, uma-kain haat de’it mak sei kontinua hela to’o ohin loron.
Jornalista: Abílio Elo Nini
Editór: Rafael Ximenes de A. Belo
