OEKUSI, 30 Marsu 2026 (TATOLI) – Dezenvolve setór turizmu iha Oekusi inklui apoia kapasitasaun no formasaun ba funsionáriu sira, Autoridade Rejiaun Administrativa Espesiál Oekusi Ambeno (RAEOA) selebra akordu ho Dili Institute of Technology (DIT).
“MoU ida-ne’e, nia objetivu atu hasa’e ita-nia kapasidade rekursu umanu liuhusi formasaun, ne’ebé sei fasilita husi DIT no dezenvolve setór turizmu,” Diretór Jerál Oekusi, Domingos Punef, hateten iha Oekusi, ohin.
Nia afirma, selebrasaun akordu ofisiál ne’e, nu’udar atividade prioridade husi Programa Movimentu Empreendedorizmu Oekusi nian ba tinan lima, hahú 2026 to’o 2030.
Notísia relevante:Autoridade RAEOA konvida DIT integra aan iha Programa empreendedorizmu dezenvolve turizmu
Reitór DIT Salustiano dos Reis Piedade, informa, akordu ofisiál fokuliu ba dezenvolvimentu turizmu iha Oekusi tanba Oekusi iha potensialidade, tanba DIT iha rekursu no iha mós sentru treinamentu no fó oportunidade ba estudante sira husi DIT, atu halo estájiu iha edifísiu públiku sira iha Oekusi.
“Iha akordu ne’e, faze dahuluk, ami fokuliu dezenvolve turizmu iha Oekusi tanba Oekusi iha fatin poténsia tebtebes, entaun ohin hahú selebra akordu depois ami sei diskute tékniku, atu ami bele hahú halo estudu viabilidade ba fatin turizmu sira iha Oekusi, depois bazeia dadus sira-ne’e, bele hakat ba faze implementasaun dezenvolvimentu nian,” nia hateten.
Notísia relevante:Programa Movimentu Empreendedorizmu Oekusi ba tinan lima lansa ona
Jornalista: Abílio Elo Nini
Editór: Rafael Ximenes de A. Belo
