DILI, 09 Abríl 2026 (TATOLI) –Ministru Komérsiu no Indústria, Filipus Nino Pereira, hateten tuir dadus ne’ebé ministériu iha daudaun seidauk iha mudansa presu ba nesesidade bázika iha Timor-Leste.
Nia subliña, tuir dadus ne’ebé sira iha depoizde reuniaun koordenasaun entre empreza distribuidór sira ba foos ninian no reuniaun asuntu ekonomia ho Ministériu Kordenadór Asuntu Ekonómiku (MKAE), empreza importadór sira hato’o katak laiha mudansa ba presu nesesidade bázika.
Notísia relevante:Folin nesesidade bázika iha supermerkadu normál – MKI
“Ba foos nian ami halo monitorizasaun akompaña no observa katak seidauk iha mudansa, presu sei normál hela entre 20kg to’o 30kg, husi foos hirak ne’e ita hare’e mós ba nia kualidade entre 5% broken 15% broken ninian, entaun folin daudaun hahú husi $8,50 to’o $13, ida-ne’e presu ne’ebé mai husi distribuidór sira, ita haree presu sei normál hela, inklui mós trigu, masin-midar, mina han nian,” Filipus Nino Pereira hateten ba TATOLI.
Aleinde ne’e, daudaun iha estoke rezervadu sira ne’ebé iha armazen empreza privadu sira hamutuk 19.588 tonelada no tuir informasaun empreza husi Perisos no Creative-Furak, sira-nia foos mós balu iha dalan mai. Foos sira ne’e barak liu hatama husi nasaun Índia, Vietname,Tailándia, husi empreza importadór sira hanesan Creative-Furak, Perisos Lixun, no TimorFood.
“Nune’e mós estoke ne’ebé rezerva iha Sentru Lojístiku Nasionál ne’e ita iha purvolta 3.000 tonelada, sira mós iha planu atu hola tan produtu lokál hanesan hare, no foos importasaun hamutuk 1.580 tonelada, ida-ne’e maizumenus asegura ai-han ba fulan tolu hanesan ne’e”, Nino dehan.
Tuir nia, Governu seidauk iha medida ruma atu bele halo atuasaun, tanba la hatene funu ne’e hotu bainhira entaun daudaun ne’e nafatin akompaña situasaun.
Notísia relevante:Governu-Setór Privadu koordena malu asegura estabilidade presu nesesidade bázika
Jornalista: Arminda Fonseca
Editór: Rafael Ximenes de A. Belo
