VIKEKE, 10 Abríl 2026 (TATOLI) – Institutu Jestaun Ekipamentus no Apoiu Dezenvolvimentu Infraestrutura, Institutu Publiku (IGEADI,I.P), ohin, hahú normaliza estrada Naheboruk diresaun postu administrativu Uatulari – Vikeke ne’ebé durante ne’e difikulta movimentasaun transporte públiku.
Diretór Servisu Obras Públika munisípiu Vikeke, Casildo Gomes Soares, informa, IGEADI,I.P movimenta ona ekipamentu pezadu ba terrenu hodi normaliza estrada Naheboruk ne’ebé mak durante ne’e prezudika movimentu komunidade.
Ekipamentu pezadu hirak ne’e mak hanesan eskavatór, tratór, kamioneta fuzu, silindru no seluk.
“Ekipa IGEADI hahú ona normalizasaun tanba durante ne’e kondisaun estrada referida sai preokupasaun bo’ot ba komunidade,” Casildo ba Tatoli, ohin.
Nia dehan normalizasaun ne’e halo ba estrada diresaun husi suku Uma Uain Kraik to’o Suku Uma Uain Leten ho distánsia km26, enkuantu estrada diresaun Suku Uaitame, Uatulari ba to’o Suku Uani Uma, Uatucarbau ho distánsia km15.
“Normalzasaun fasilita movimentasaun komunidade hodi asesu ba merkadu no hadi’ak ekonómia familiar,” Casildo salienta.
Casildo dehan normalizasaun ne’e hanesan aktividade emerjénsia hodi prepara ba reablitasaun estrada permanente.
Nia konklui aktividade normalizasaun la’o di’ak tebes iha terrenu tanba kuperasaun di’ak ho autoridade lokál.
Jornalista: Vitorino Lopes da Costa
Editór: Filomeno Martins
