DILI, 11 Abríl 2026 (TATOLI) – Astronauta na’in haat Estadu Unidu Amérika (EUA) kompostu hosi Reid Wiseman, Victor Glover, Christina Koch, no Jeremy Hansen to’o hikas mundu hafoin kompleta misaun istórika semo ba fulan.
Entre astronauta na’in haat ne’e, Victor Glover mak astronauta metan primeiru semo ba fulan. Christina Koch sai nu’udar feto dahuluk semo ba fulan, Jeremy Hansen mak astronauta Kanadianu primeiru, enkuantu Reid Wiseman lidera misaun nu’udar komandu Artemis II.
Misaun Artemis II to’o no tun iha tasi San Diego, Califórnia, EUA iha tuku 8:07 kalan, sesta-feira (10/04).
Hafoin loron 10 semo ba espasu fora hosi atmosfera mundu, misaun Artemis II kompleta viajen ida ho distánsia serka 1.1 millaun kilometru.
Ho distánsia referida marka misaun Artemis II nu’udar viajen do’ok liu entre kualker misaun hotu ne’ebé mak semo ona ba fulan.
Misaun Artemis II marka susesu umanu-nian semo ba fulan hafoin tinan 50 resin desde misaun Apollo 17 iha Dezembru 1972.
Hafoin fila hikas mai mundu, astronauta na’in haat ne’e espresa sentimentu alegria bainhira hasoru hikas familia no kolega serbisu.
Sira na’in haat mak astronauta ne’ebé semo ho atenbrani nu’udar preparasaun importante ida atu hakat ba misaun Artemis tuir-mai atu lori astronauta sira ba tun, sama no la’o iha fulan.
Ajensia National Aeronautics and Space Administration (NASA) EUA haktuir katak tinan 2028 marka nu’udar tempu appropriadu hodi lansa misaun Artemis III no IV ne’ebé mak sei lori astronauta sira ba tun no la’o iha fulan.
Misaun Artemis II lansa ho susesu iha loron 1 Abríl, 2026, tuku 6:24 lorokraik, iha NASA ninia Sentru Espasial Kennedy, Flórida, EUA.
Tuir deklarasaun Administrador Nasa, Jared Isaacman ne’ebé mak sita hosi Gazeta do Povo katak misaun Artemis II ninia misaun klasifika nu’udar susesu kompletu.
Nia dehan susesu ne’e reprezenta atinjimentu signifikativu ida la’os de’it ba NASA maibe ba mos umanidade tomak.
Misaun Artemis II hetan elojia hosi prezidente Donald Trump, no Prezidente ne’e parabeniza astronauta na’in haat hodi konsidera sira-nia misaun “espetakular”.
Misaun Artemis II marka pasu desisivu ba programa NASA nian, liu-liu semo ba fulan no loke dalan ba etapa foun esplorasaun espasial, inklui misaun sira atu semo ba Marte.
TATOLI
