BOBONARU, 13 Abrìl 2026 (TATOLI)-Motorista bís Autokaru diresaun Maliana ba Dili husu Ministériu Transporte no Telekomunikasaun (MTK) atu hasa’e tarifika ba kada pasajeiru husi $6 ba $7, tanba impaktu hosi kombustivél sa’e.
Motorista bís Amigo, Fransisco dos Santos, afirma folin kumbustivél sa’e iha nasionál no Munisípiu afeta tebes ba sira nia rendimentu lor-loron.
Notísia Relevante:DNTT husu motorista sira labele hasa’e tarifa bis Maliana-Dili
“Ami bís Dili-Maliana husu de’it ema ida $7 tanba mina agora karun, litru ida sa’e to’o $1,50 no $1,60. Ami tula ema ida US$6, ami ense mina mós la to’o, ami han de’it mós la to’o no estor fó patraun mós la to’o,” nia informa ba Jornalista sira, iha terminál Tunubibi, Segunda ne’e.
Motorista bís Bintang 2, Martinho Borges, husu MTK atu konsidera asuntu ne’e tanba folin tarifika atuál labele rekupera ho gastu viajen.
“Agora ami hala’i ba mai ema laiha tan, mina karun tan, ami ba de’it ense mina $100 nian, ne’e ami ba mai ne’e ba hotu mina nia de’it. Ne’e mak ami hakarak husu ba na’i ulun sira hare ba ida ne’e. Ami hakarak hasa’e presu selu kada pasajeiru ida US$7. Ne’e ami bele han no estor bele to’o,” nia dehan.
Ba Kestaun ne’e, Diretór Servisu Transporte Terrestre delegasaun teritoriál Munisípiu Bobonaru, Tomas Maia, konfirma to’o agora governu seidauk halo mudansa tarifika no mantein ho US$6 kada pasajeiru.
Notísia Relevante:Motorista Bus Taro 21 Maliana preokupa ho folin mina sa’e
“Atu hasa’e ka hatun ne’e ami iha ne’e hein ezekuta de’it orientasaun husi governu sentrál. Maibé mensajen DNTT (Diresaun Nasional Transporte Terrestre) nia ba sira se karik folin mina sa’e maka’as liu, senti la hetan rendimentu ne’ebé di’ak buka meius para deskansa lai. Tanba mina folin sa’e ne’e problema mundiál, la’os ita nia governu mak hasa’e nia presu,” nia deklara.
Enkuantu tuir dadus husi DNTT Bís Autokaru hamutuk 42 mak halo operasaun tulan no hatun pasajeiru husi Maliana ba kapitàl Dili.
Jornalista : Sergio da Cruz
Editora : Armandina Moniz
