DILI, 19 Abríl 2026 (TATOLI) – Arsebispu Arkideoseze Dili, Don Virgílio Kardeal do Carmo da Silva, SDB, hamutuk ho Ministra Edukasaun, Dulce de Jesus Soares, ofisialmente, inaugura ona Edifísiu Eskola Katólika Colégio São José Operariu Balide, ne’ebé kompleta ona husi empreza Faneki Unipesoal. Lda no etrega ba estabelesimentu ensinu hodi utiliza ba atividade letiva.
Don Virgílio Kardeal do Carmo da Silva, konsidera momentu ida-ne’e hatudu uma kreda nia komprimisiu ba edukasaun, tanba papél edukasaun ba uma kreda la’ós ohin, maibe hahú kedan husi tempu uluk.
“Maski tempu difísil barak maibé uma kreda buka nafatin atu tau matan ba edukasaun, oinsá atu rekoñese ita-nia misionáriu sira-ne’ebé fó-an servisu ba edukasaun, nune’e ita dehan katak sira hanesan baze edukasaun ida,” Don Virgílio Kardeál dehan liuhusi diskursu, iha serimónia inaugurasaun edifísiu Kolegio São José balide, ohin.
Kardeál subliña prezensa eskola katólika la’ós halo kompetisaun ho eskola seluk maibé eskola katólika iha nia identidade no misaun rasik.
“Dalabarak ha’u vizita eskola sira, ha’u sempre husu ba dirijente sira, sinál marka saida mak ita hatudu nu’udar eskola katólika? Tan-ne’e pergunta ida husu ba profesór no estudante sira atu ida-idak buka hodi hatán ba ida-ne’e, saida mak marka no identidade eskola katólika nian. Entaun Eskola la’ós de’it fatin atu transmite siénsia, maibé eskola espasu atu aprende, atu moris,” nia dehan.
Don Virgílio hatutan, inaugurasaun edifísiu ne’e sai hanesan momentu istóriku ida ba iha Koléjiu São José Operáriu Balide.
“Tanbasá ida-ne’e istoria? Ha’u dehan ita iha sasin tán istória ida tanba iha tinan-2016, ha’u mai dahuluk iha-ne’e Padre Mateus Afonso entrega eskola Kolégio São José Operáriu ba dioseze, no halo inaugurasaun ba eskola pizu ida iha sorin ne’ebá iha tinan 10 liubá,” Kardeál aprofunda.
Amu Bispu haktuir katak, husi tinan 2016 eskola ne’e entrega ba Padre Venceslau mak halo mellora hodi hadi’a liután fasilidade iha eskola ne’e, oinsá hatur eskola ne’e nia identidade nu’udar eskola Katólika.
“Husi poupansa ne’ebé Padre Venceslau halo, tuir mai Padre César Magno kontinua, mak ohin ita haree edifísiu foun ida-ne’e. Nune’e fiar katak ho kolaborasaun Governu nian bele hametin no metin liután prinsípiu edukasaun nian, liu-liu iha konteste atuál,” Amu Bispu dehan.
Iha fatin hanesan Ministra Edukasaun, Dulce de Jesus Soares konsidera infraestrutura eskolár importante tebes ba eskola, liu-liu ba eskola Katólika no privada sira atu fó imajen di’ak ida katak eskola ne’e iha duni kualidade.
“Ita hotu hatene igreja Katólika mak instituisaun ne’ebé responsável ba dezenvolvimentu barak iha ita-nia rain, espesialmente iha área edukasaun, iha eskola São José Operáriu hanesan eskola Katólika ida harii tinan barak ona, ita fiar katak estudante sira la’ós mak buka matenek de’it, maibé fatin ida-ne’e sai fatin ida
-ne’ebe mak buka matenek, étika no morál atu sai sidadaun no jerasaun ba futuru nasaun nian,” Ministra Dulce hateten.
Ministra Dulce hateten, istória hatur ona katak edukasaun hahu husi Katolika, tanba ne’e padre sira kontinua esforsu atu tau importánsia ba edukasaun iha Timor-Leste
“Ha’u la’ós dehan eskola públiku sira ladi’ak, maibé ami enfrenta dezafiu oin-oin, dalabarak ha’u husu padre sira atu ajuda eskola públiku sira, no barak mak la’o ona no ba futuru bele ajuda mellora di’ak liután eskola públiku sira,” nia tenik.
Biban ne’e, Ministru Edukasaun, Dulce de Jesus, apela atu labele haree de’it ba edifísiu ne’ebé di’ak maibé tenke hatudu mós buat di’ak husi edifísiu ne’e nia laran.
Nune’e mós, Diretór Eskola São José Operáriu Balide, Padre César Magno, dehan edifísiu referidu nia fundu maihusi eskola nian rasik, ne’ebé hamutuk $1.100.742.44.
“Ita-nia konstrusaun ba eskola ne’e ho modelu pizu rua ho totál sala hamutuk 26, kompostu husi saladeaula hamutuk 16, sala 2 ba Koordenadór no vise Diretór, sala 1 ba konsellu dod pais, salaun iha ida, Kazabañu iha 6. Ho nune’e saladeaula ba Koléjiu São José Operariu ne’ebé antes ne’e iha 28 agora sa’e ba saladeaula 38 inklui ho laboratóriu ba siénsia naturál, siénsia sosiál no laboratóriu ba língua, ne’ebé sei utiliza husi ensinu báziku no ensinu sekundáriu,” Padre Cesar akresenta.
Tuir planu ne’ebé iha katak konstrusaun referidu hanesan faze dahuluk no sei iha faze daruak ne’ebé sei realiza iha tinan tuir mai. Entretantu, edifísiu referidu konstrui husi empreza Faneki Unipesoal. Lda, liuhusi tenderizasaun ne’ebé loke tinan tolu liubá, ho nia durasaun tinan ida. Maibé depoiz konstrusaun empreza iha problema balun, nune’e extende tan ba tinan rua to’o ohin loron halo inaugurasaun.
“Ami konsiente katak konstrusaun ne’e la’ós de’it maihusi simente no batako, maibé hatudu ami-nia komprimisiu hanesan eskola Katólika ida-ne’ebé hakarak oferese edukasaun ida di’ak ba estudante sira,” nia hakotu.
Jornalista: Osória Marques
Editor: Rafael Ximenes de A. Belo
