DILI, 28 Abríl 2026 (TATOLI)—Universidade Nasionál Timor Lorosa’e (UNTL) liuhusi Departamentu Desportu, Tersa ne’e, organiza konferénsia internasionál atu promove siénsia desportu ba estudante sira iha Fundasaun Oriente.
Vise-Diretór Departamentu Edukasaun Fízika no Desportu iha UNTL, Francisco Barbosa Pereira, hateten konferénsia internasionál ne’e ho objetivu atu promove siénsia desportu liuliu inkluzaun sosiál nian ba estudante Departamentu Desportu iha UNTL.
“Iha konferénsia internasionál ne’e, ita atu halo diskusaun kona-ba prátiku ezersísiu nian, nune’e bainhira ita halo publikasaun iha jornál sientífiku ema hotu bele akompaña no lee kona-ba fenómenu desportu iha Timor-Leste,” nia dehan ba jornalista sira.
Nia dehan benefísiu husi konferénsia internasionál kona-ba siénsia desportu ne’ebé UNTL kada tinan organiza, ninia rekursu Departamentu Desportu barak mak enkaixa ona ba empregu.
“Maski iha lei baze edukasaun la permite baxarelatu atu hanorin iha sekundáriu, maibé realidade departamentu desportu nia estudante balun halo kna’ar hanesan manorin desportu iha ensinu báziku no mós sekundáriu,” nia esplika.
Aleinde ne’e, estudante barak mós sai hanesan árbitru ba federasaun no mós asosiasaun futeból sira no sai treinadór ba klube sira balun.
“Entaun, ita-nia departamentu la’ós prodús estudante atu sai profesór de’it, maibé sira hetan oportunidade seluk iha federasaun no asosiasaun sira,” nia hateten.
Portantu, Vise Reitór ba Asuntu Akadémiku UNTL, Câncio Monteiro, informa UNTL iha papél tolu mak hanesan diseminasaun koñesementu liuhusi atividade edukasaun, peskiza sientífiku no kontinuasaun ba sosiedade. Entaun, konferensia sientífika ne’ebé Departamentu Desportu UNTL hala’o hola-parte husi UNTL nia papél tolu ne’e rasik.
“Entaun, oinsá ita bele kontribui ita-nia koñesimentu sientífiku ba sosiedade hodibele mellora sosiedade nia nesesidade, nune’e ezisténsia departamentu ida-ne’e importante katak saúde iha ita-nia liman rasik, ho lema ida hateten mes sano ekoporesano,” nia subliña.
Nia hatutan ezisténsia departamentu ne’e bele kontribui ba promosaun no prodús rekursu umanu ne’ebé kompetente iha área desportu nian.
“Atu eleva ita-nia kualidade tenke liuhosi espasu sientífiku sira, ita bele fahe koñesimentu ba ema seluk kona-ba kurríkulu aprendizajen nune’e bele aposta ba kualidade ne’ebé di’ak iha UNTL liuhosi ba desportu,” Vise-Reitór akresenta.
Entretantu, Profesór Desportu UNTL, José Lopes, hateten konferénsia internasionál ne’e hanesan oportunidade ba estudante desportu sira, oinsá atu eleva abilidade liuliu iha área espesialista ba matéria desportu tanba matéria desportu la’ós atu hanorin de’it iha saladeaula no pratika iha saladeaula laran, maibé hanesan parte investigasaun ida.
“Ami iha Departamentu Desportu hakarak organiza konferénsia internasionál ne’e boot liután kona-ba siénsia desportu. Maibé, ami sempre haree ba objetivu dezenvolvimentu sustentavel. Tinan-ne’e ami buka parte turizmu no inkluzaun tanba Timor-Leste sai ona hanesan membru ASEAN, entaun bele sai merkadu foun ba estudante desportu atu hetan oportunidade barak,” nia dehan.
Nia akresenta estudante ne’ebé estuda iha Departamentu Desportu la’ós atu sai profesór de’it, maibé bele sai mentór desportivu, jestór desportu no bele sai desizór desportivu.
“Ba futuru sira bele sai instrutór ba atividade desportu, entaun ami sempre haree ba realidade. Ami foku ba desportu ba labarik no joven sira, nune’e bele responde ba nesesidade nasaun,” José tenik.
Jornalista: Osória Marques
Editór: Xisto Freitas da Piedade
