DILI, 04 Maiu 2026 (TATOLI)-Parlamentu Nasionál (PN) elojia Governu ba esforsu iha negosiasaun fronteira marítima entre Timor-Leste no Indonézia ne’ebé hatudu progresu ne’ebé signifikativu.
Deputadu husi bankada Kongresu Nasionál Rekonstrusaun Timorense (CNRT, sigla portugés), Domingos Augosto ‘Deker’, felisita Primeiru-Ministru, Xanana Gusmão, no ekipa tomak ba sira-nia empeñu esforsu kontínuu iha negosiasaun fronteira terrestre no marítima entre país rua.
“Espera katak ho negosiasaun datoluk nian bele fó esperansa hodi finaliza ho lalais”, nia hato’o liuhusi intervensaun iha reuniaun plenária Parlamentu, ohin.
Nomós deputadu CNRT, Gabriel Soares, manifesta nia apresiasaun no rekoñesimentu ba Xefe Goernu ho nia ekipa ne’ebé luta la kolen atu defende soberania país nian, ne’ebé sai nu’udar kontinuidade luta naruk durante tinan 24 depoizde independénsia nasaun.
Nia husu nafatin orasaun hodi akompaña líder sira atu kontinua diskute hodi deside tiha fronteira marítima ho nasaun viziña.
“Ba maun-boot ami hanesan timoroan apresia ba ita-boot, mezmu ho idade hanesan ne’e, ita-boot la sura kolen, hakarak rai ne’e nia dignidade iha markasaun soberania totál kompletu”, dehan.
Deputadu husi bankada Kmanek Haburas Unidade Nasionál Timoroan (KHUNTO), António Verdial de Sousa, afirma susesu husi sormutu altu nivel entre nasaun rua ne’ebé dalabarak hetan apoiu husi Singapura iha ámbitu integrasaun ASEAN nu’udar prova ba Xefe Governu nia lideransa diplomátika ne’ebé forte.
“Kona-ba ne’e, bankada hakarak hato’o apresiasaun. Bankada subliña papél Xanana nu’udar unifikadór no konstrutór ba relasaun di’ak. Susesu sorumutu hirak ne’e, nu’udar evidénsia klaru ba imi-nia kompromisu atu harii futuru amizade ne’ebé metin entre Timor-Leste ho nakfilak pasadu sai fundasaun ba kolaborasaun”, nia hateten.
Lembra katak negosiasaun ba Delimitasaun Fronteira Marítima entre Timor-Leste no Indonézia iha ronda datoluk nian, durante loron tolu, entre 27 no 29 Abríl, iha Singapura, marka progresu ne’ebé signifikativu.
Tuir komunikadu Governu ne’ebé Tatoli asesu, negosiasaun ronda datoluk iha Singapura ne’e hanesan kontinuasaun husi enkontru primeira ronda ne’ebé hala’o iha Dili, iha Agostu 2025, no segunda ronda ne’ebé hala’o iha Jogjakarta, Indonézia, iha Dezembru 2025.
Primeiru-Ministru, Kay Rala Xanana Gusmão, ne’ebé akompaña direta ekipa negosiasaun Timór ne’e konsidera iha susesu boot, tanba parte rua loke an, rona malu no konsege iha entendimentu ida hodi la’o tuir de’it Lei Direitu Internasionál Tasi nian.
Notísia releante: Negosiasaun Fronteira Marítima iha Singapura lori rezultadu signifikativu ba Timor-Leste no Indonézia
Jornalista: Nelson de Sousa
Editora: Maria Auxiliadora
