DILI, 08 Maiu 2026 (TATOLI)–Sidadaun Olandina do Rosário hetan asidente no hakotu iis iha fatin, bainhira ho motór husi dirasaun Bekora mai Kuluhun, hetan xoke husi karreta tula tenke mina husi empreza ETO, ne’ebé husi diresaun Hera mai Dili.
Kazu ne’e akontese iha Sesta maizumenus tuku 09:52 bainhira sidadaun kondús motór ho xapa matríkula 1592.TL iha estrada, hodi la’o iha oin, nune’e karreta tanke mina ne’e la’o hela husi Olandina nia kotuk, karreta ne’e koko atu ultrapasa Olandina ho nia motor, nune’e halo sidadaun ne’e hakfodak ho motór no monu ba rai mak karreta sama nia ulun to’o nia ulun belar.
Xefe Seksaun Seguransa Tránzitu Rodoviária Komandu Polísia Nasionál Timor-Leste (PNTL) Munisípiu Dili, Superintendente Asistente Polísia Afonso da Silva, konfirma, ohin dadeer akontese duni asidente ida entre karreta tanke mina Eto ho motór ida nune’e rezulta sidadaun feto ida lakon vida.
“Daudaun karreta tanke mina no motorizada mós iha ona ita-nia fatin, motorista ne’ebé lori tanke mina ne’e ho inisiál EPG. Prosesu kazu ne’e depois akontesimentu kolega sira bá kedan fatin hodi rekolla evidénsia,” Afonso da Silva hateten ba Jornalista sira iha ninia knaar fatin, Kaikoli, Sesta ne’e.
Nia dehan, Polísia daudaun ne’e halo hela identifikasaun ba karreta tenke mina no lori ona mai Tránzitu Dili hodi submete ba investigasaun depois sei kanaliza ba Ministeriu Públiku hanesan baibain.
Kona-ba detein kondutór karreta tenke mina ne’e ka lae, Xefe Tránzitu PNTL Munisípiu Dili ne’e hateten, normalmente asidente ne’ebé ema lakon vida, atu detein ka lae ne’e depende ba investigasaun.
“Haree tuir nia relatóriu ne’e, tanba ne’e ema lakon vida, sei foti kondutór ne’e nia deklarasaun. Halo tiha identifikasaun depois prosesu kontinuasaun mak ami sei informa fali ba mídia,” nia akresenta.
Notísia relevante : PNTL rejista asidente tráfegu 50-resin iha semana ikus ne’e
Bainhira Polísia lori tiha matebian ba mortuáriu Ospitál Nasionál Guidu Valadares (HNGV) bá haree kedan CCTV.
“Daudaun sira foin mai iha fatin. Kauza ne’e mai husi motorista na’in-rua, maibé ita hein ninian prosesu investigasaun, depois mak determina ninian kronolojia loloos asidente iha terenu,” nia hato’o.
Iha CCTV ne’ebá indika katak truk mina ne’e mak tenta ultrapasa motorista ne’ebé lori motorizada depois mak akontese asidente.
Kazu ne’e tuir CCTV akontese iha tuku 09:52, ohin Polísia to’o iha fatin 10:15 depois hein kontaktu husi Delta II hodi halo atendimentu.
Xefe Seksaun dehan, Ministériu Públiku fó tempu kazu sira ne’e loron-tolu hosi halo auto-notísia depois submete.
“Labele liu loron-tolu, se liu loron-tolu evidénsia buat sira ne’e Ministériu Públiku la simu. Polísia esforsu iha loron-tolu bele finaliza,” nia katak.
Jornalista : Natalino Costa
Editora : Julia Chatarina
