OEKUSI, 19 Maiu 2026 (TATOLI) – Autoridade lokál suku Lifau iha sub-rejiaun Pante Makasar no suku Bobometo iha sub-rejiaun Oésilo, Rejiaun Administrativa Espesiál Oekusi Ambenu (RAEOA), preokupa ho liña internet Starlink ne’ebé antes ne’e, Ministériu Transporte no Komunikasaun (MTK) liuhusi Diresaun Nasionál Infraestrutura Komunikasaun (DNIK) hamutuk ho empreza Vorakai Unipesoál Lda instala iha sede suku ira maibé seidauk bele utiliza hodi asesu internet.
Notísia relevante:DNIK oferese Starlink ba Autoridade RAEOA instala ba sede suku 20 iha Oekusi
Xefe Suku Lifau, Delfino Sole, hateten, daudaun ne’e, Starlink sira instala ona iha sede suku maibé husi parte responsavel ba instalasaun seidauk ativu kuaze fulan ida ona hodi utiliza.
“Ami agradese tanba monta ona Starlink kompleta kedas ho komputadór iha sede suku, maibé seidauk ativu, tanba sira dehan suku idaidak nia kódigu ka password sei kria, ne’e ami sei hein kuaze fulan ida buat sira-ne’e seidauk ativu atu asesu internet,” nia hateten iha suku Lifau, foin lalais ne’e.
Maibé Autoridade lokál ne’e, konsidera bainhira ativa ona, sei fasilita serbisu suku nian atu asesu informasaun sira husi rai-laran no rai-li’ur, maibé prioridade liu maka atualiza dadus populasaun ba Sistema Integradu Informasaun Jestaun Dadus Suku no Aldeia nian (SIIGDSA).
Notísia relevante:Manetelu klarifika instalasaun antena Starlink iha suku 450 ne’e la’ós desizaun polítika
Xefe Suku Bobometo, José Labi Caet, informa, ekipa husi parsériu kompañia Vorakai Unipesoál Lda instala ona ekipamentu Starlink iha sede suku Bobometo maibé to’o ohin loron seidauk ativu hodi utiliza ba nesesidade suku nian.
Xefe Suku ne’e afirma katak, internet daudaun ne’e iha suku Bobometo difikulta tebes serbisu administrasaun suku liliu rekolla dadus hodi atualiza ba sistema, tanba ne’e nia espera iha tempu-badak, empreza bele ativa ona, nune’e bele asesu ho di’ak.
“Monta tiha ona iha fulan kotuk, maibé to’o agora seidauk ativa, ne’ebé ami la bok no la uza ida, komputadór mós tau ona iha ne’e. Ita espera sira husi nasionál bele mai ativa ona atu ita-bele utiliza, tanba iha sede suku, entaun komunidade sira sei mai asesu direta, tanba ami iha área rurál ami atu asesu susar tebes atu hetan rede di’ak,” nia hateten.
Notísia relevante:DNIK klarifika instala antena Starlink ne’e provizóriu la’ós permanente
Rekorde fali katak, antes ne’e, iha loron 16 fulan-Abríl foin lalaís ne’e, Ministériu Transporte no Komunikasaun (MTK) liuhusi (DNIK) hamutuk ho empreza Vorakai Unipesoál Lda, instala ona Starlink ba sede suku 18 iha Oekusi la inklui suku foun rua, Monemekono Kutete.
Jornalista: Abílio Elo Nini
Editór: Rafael Ximenes de A. Belo
