OEKUSI, 18 Maiu 2026 (TATOLI) – Serbisu Rejionál Edukasaun Rejiaun Administrativa Espesiál Oekusi Ambenu (RAEOA), segunda-feira lorokraik, ne’e, hasai sirkulár ofisiál ida ho númeru referénsia, 13/Sirk-SRE/RAEOA-TL/V/2026, dirije ba dirijente sira iha nível ensinu hotu inklui funsionáriu Serbisu Rejionál Edukasaun atu partisipa másima iha komemorasaun loron Restaurasaun Independénsia 20 Maiu 2026 ne’e.
Notísia relevante:RAEOA sei komemora 20 Maiu iha Pante Makasar, desportu adia ba Novembru
Karta sirkulár ne’ebé Ajénsia Tatoli,I.P asesu segunda ohin, katak, orientasaun isár bandeira Nasionál ba komemorasaun loron Restaurasaun Independensia RDTL, 20 de maio de 2026, ne’ebé ho klasifikasaun importante atu partisipa no kumpre.
“Ho máxima respeitu no konsiderasaun, saudasaun patriotizmu no nasionalizmu!, bazeia ba asuntu iha leten, Serbisu Rejionál Edukasaun (SRE) Oekusi, ho umilde orienta no sirkula informasaun ba dirijente eskola sira iha nível ensinu hothotu katak, ‘ita hotu labele husik liu loron boot nasionál no istóriku sira ba férias,” refere iha sirkulár ofisiál ne’ebé asina direita husi Diretór Serbisu Rejionál Edukasaun Oekusi, Vincêncio Cono.
Ne’e duni, Diretór SRE-RAEOA, husu dirijente eskola sira, atu organiza isár bandeira nasionál RDTL iha eskola ida-idak iha territóriu RAEOA, tantu eskola sira parte foho ka dook husi fatin serimónia jerál nian.
“Husu atu konvida inan-aman no komunidade edukativa atu partisipa iha loron importante ida ne’e, furak liutan kuandu priènxe ho atividade no animasaun sira ho karatér edukativa, mezmu iha loron feriádu, iha kalendáriu eskolár, mai ita kuda nafatin nasionalizmu no patriotizmu luhusi atividade sira ne’e,” apela husi sirkulár ne’e.
Notísia relevante:Vox Pop: “Hatudu ita-nia nasionalizmu ba rai ne’e”
Aleinde ne’e mós, husu mós ba dirijente no funsionáriu sira, iha Serbisu Rejionál Edukasaun Okeusi, obrigatoriamente partisipa iha seremónia loron nasionál referida.
“Seremónia isar bandeira mensionál, uniformiza ho orás tuku 08:00 dadeer to’o remata, fatin iha kampu Um de Maio Palaban”.
Jornalista: Abílio Elo Nini
Editór: Rafael Ximenes de A. Belo
