OEKUSI, 28 Maiu 2026 (TATOLI) – Ekipa konjunta komposta husi Polísia Nasionál Timor-Leste (PNTL), Serbisu Nasionál Intelejénsia (SNI) no serbisu sekreta J2, kinta-feira ohin, kaptura ona detidu ho naran kumpletu Cancio Mauno, iha bairru Bi-Oni suku Taiboko sub-rejiaun Pante Makasar Pante Rejiaun Administrativa Espesiál Oekusi Ambeno (RAEOA) no daudaun ne’e detein ona iha sela detensaun komandu PNTL Oekusi, hafoin halai lakon.
Notísia relevante:PNTL Oekusi buka tuir Prizioneiru CM ne’ebé halai sai hafoin tuir julgamentu
Komandante PNTL Oekusi, Superintendente Xefe Polísia, Nicolau Francelino da Costa, esplika, prosesu kapturasaun ne’e liuhusi kooperasaun ho ekipa konjunta hodi kaptura iha oras tuku 13:00 lorokraik ne’e tanba priozioneiru ne’e subar iha nia rezidénsia, rai moris fatin iha bairru Bi-Oni suku Taiboko.
“Detidu ne’ebé foin daudaun halai sai husi ekipa prizionál sira-nia liman, iha loron sábadu semana kotuk tuku 18:00 lorokraik, ohin tuku 13:00 meudia, ekipa konjunta halo ona kapturasaun, no daudaun ne’e detidu asegura hela iha sela komandu PNTL Oekusi, hodi hein atu halo fali auto-entrega ba Ministériu Públiku,” nia hateten ba Ajénsia Tatoli,I.P iha Oekusi, ohin.
Autoridade seguransa ne’e informa, Komando Rejionál Oekusi, sei relata fali rezultadu kapturasaun ne’e ba iha komandu Jerál PNTL, kona-ba prosesu kapturasaun detidu nian, tanba detidu durante loron neen, nia subar de’it iha nia rezidénsia rasik.
“Ekipa konjunta kaptura iha nia rezidénsia rasik, iha bairru Bi-Oni suku Taiboko, no kazu ne’e ita-bele dehan katak, labele hein kle’ur,” nia afirma.
Komandante Nicolau, konfirma, detidu sei detein iha sela komandu PNTL Oekusi, hodi hein parte investigasaun kriminál sei prepara hela nia relatóriu prosesu kapturasaun hodi entrega ba Ministériu Públiku.
Tanba ne’e, autoridade seguransa ne’e apela, ba responsabél priozioneiru sira, atu hala’o serbisu hatudu profisionál, tanba prosesu kapturasaun presiza tempu maka foin iha solusaun.
“Ha’u informa de’it ba ekipa prizionál sira, bainhira atu lori detidu mai tan karik, tenke kuidadu, tanba bainhira detidu sira halai sai, ninia prosesu kapturasaun presiza tempu, no presiza kooperasaun ho entidade hotu atu kontribui,” nia apela.
Lembra fali katak, detidu ka rekluzu Cancio Mauno, halai sai husi responsavel prizionál sira-nia liman, akontese iha loron sábadu semana kotuk, 23 Maiu 2026, iha oras tuku 18:00 lorokraik, bainhira atu partisipa prosesu julgamentu iha Tribunál Primeira Instansia Distritál Oekusi (TDO).
Jornalista: Abílio Elo Nini
Editór: Rafael Ximenes de A. Belo
