DILI, 30 Maiu 2026 (TATOLI)—Estádiu Munisipál Dili no adeptu ua’in ba ua’in sai sasin ba jogu entre ekipa Fitun Estudante Lorosa’e (FIEL) FC vs Ponta Leste FC iha Sábadu loraik ne’e. Jogu atrativu maibé lori arrependimentu. Ponte Leste fila ho novidade moruk. FIEL fiel ba nia ambisaun hodi hadau vitória husi Ponte Leste ho skor 3-2, iha jogu kontinuasaun segunda divizaun Liga Futeból Timor-Leste (LFTL) époka 2026.
Iha jogu ne’e, jogadór Lourenço Ximenes sai eroi ba FIEL. Nia hadau pontu tolu husi impata ne’ebé Ponta Leste haki’ak iha minutu 80. Iha minutu 80, jogu impata 2-2, tanba jogadór Ponta Leste, Juvito Nascimento ko’a FIEL nia lideransa, maibé iha minutu 81 Lourenço hadau fila vitória no lori FIEL ba vitória puru.
Hanesan baibain, tuir kultura futeból nian, jogu atu hahú, lidera husi árbitru sira. Árbitru hú ona árbitu signifika joga atu la’o. Bainhira jogu husi ekipa rua komesa, jogadór sira lansa kedan kontra no atake ba malu tuir tékniku no abilidade ekipa idaidak nian oinsá atu hatama golu.
Jogu la’o manas liu bainhira jogadór FIEL sira kombina malu ho di’ak no utiliza formatu 4-3-3, kontra Ponta Leste ne’ebé ho formatu 4-4-2. FIEL kaer bola ho sériu duni ho lais hakarak hatama lalais golu. Ho esforsu ne’ebé FIEL iha, la hela de’it ho esforsu basá iha minutu 13, João Ximenes aproveita biban ne’ebé iha liuhusi xutu ho ain loos iha grandeia adversária, bola tama liubá rede laran Ponta Leste nian, tan ne’e muda rezultadu ba 1-0.
Jogu kontinua la’o husi minutu ba minutu. Ponta Leste nafatin hatudu nia ritmu jogu ho bola long, maibé FIEL hasoru ho kalma liuhusi hamate bola. Xutu balun Ponta Leste nian ne’ebé avansadu lansa, nafatin la kona alvu. Ponta Leste lakon bola barak iha liña klaran. Maski nune’e, treinadór Ponta Leste la nonook. Nia kontinua organiza jogadór sira oinsá hala’o jogu tuir ritmu Ponta Leste nian rasik.
Relójiu nia ponteiru baku ba minutu 22. Minutu ida-ne’e fó benefísiu ba Ponta Leste. Ario Ximenes responde ho golu hodi dudu Ponta Leste impata 1-1 ho FIEL. Ario foti nia ain liki bola kuaze metru sanulu (10) ba guarda rede FIEL maibé guarde rede labele salva. Bola konsege golu.
Husi golu Ponta Leste nian hanesan golu ikus ba ekipa rua iha jogu primeira parte. Iha segunda parte, ekipa rua kontinua lansa kontra atake ba malu. FIEL agresivu liután. Domina bola kompara ho Ponta Leste. Armada azúl halo armada mean book an ladi’ak. FIEL halimar bola long (aas) barak liu kompara ho primeira parte. Enkuantu, Ponta Leste halimar bola rai ka pasa husi ain bá ain. Maibé, esforsu hirak-ne’e hela ho esforsu tanba la prodús golu ruma.
Jogu la’o to’o minutu 50 nunka akontese golu. Xutu barak la kona alvu. Adeptu sira hein ba hein maibé golu seidauk akontese de’it. Treinadór sira mós preokupa ho vaziu ida-ne’e. Sira (treinadór) la hakmatek. Sira kontinua fó instrusaun ba nia jogadór sira iha kampu atu rezulta golu. Sorte mai daudaun. Iha minutu 52, jogadór Lourenço Ximenes fó esperansa ba FIEL. Ho kapasidade indivíduu ne’ebé Lourenço iha, hahoris golu ba daruak ho skor 2-1.
Ponta Leste la nonook. Nia hakarak duni FIEL. Ambisaun ida-ne’e sai realidade. Bainhira ema hotu hanoin FIEL manán ona, Juvito Nascimento mosu hanesan salvadór ida hodi hatuur Ponte-Leste iha liña ida ho FIEL. Iha minutu 80, Juvito hatama ho golu ho kabesa iha-ne’ebé muda skor sai 2-2.
Golu ne’e relativu. Liu de’it minutu ida, minutu 81, Lourenço Ximenes hadook kedas FIEL husi derrota iha minutu ikus. Ho nia maneira rasik, ko’a bola bá klaran, xuta ho ain karuk, bola semo loloos bá guarda-rede ho lais tebes halo guarda-rede adversáriu falla antesipa. GOOOL! Bola golu. Golu nakfilak ba 3-2. Adeptu sira iha tribun hakilar husi kintu-kantu hodi festeja vitória. Lourenço nia golu, FIEL nia vitória.
Husu rezultadu golu ne’e, lori FIEL lidera provizória tabela klasifikasaun ho pontu neen (6), manán Académica FC ho skor 1-0 no manán Ponta Leste ho 3-2.
Jornalista: Hortêncio Sanchez
Editór: Xisto Freitas da Piedade
