DILI, 01 juñu 2026 (TATOLI)—Asosiasaun Parteira Timor-Leste (APTL) rekoñese parteira sira-ne’ebé daudaun ne’e servisu iha fasilidade saúde iha Timor-Leste sei menus.
“Loos duni, foin daudaun Ministériu Saúde halo rekrutamentu ba profisionál saúde sira maibé dezafiu ida mak kolokasaun parteria sira iha área rurál sei menus. Tanba parteira ne’e la’ós UNTL de’it mak prodús maibé universidade no institutu privadu seluk mós prodús graduadu parteria barak, maibé problema prinsipál mak kolokasaun servisu tuir nesesidade komunidade. Ita haree iha área rurál, dala barak parteria ida de’it tenke halo servisu ba ema barak, ne’ebé sai dezafiu boot tanba karga servisu todan tebes,” Prezidente Asosiasaun Parteira Timor-Leste, Lidia Gomes, hateten ba jornalista sira iha Maskarinhaas, ohin.
APTL kontinua ko’alia ho Ministériu Saúde atu bele implementa planu estratéjiku to’o 2030, ne’ebé prevee parteria na’in-rua (2), ienfermeiru na’in-rua (2), médiku na’in-rua (2) no tékniku aliadu seluk tau iha postu saúde liuliu iha suku sira iha Timor-Leste.
Tuir dadus ne’ebé mak aprezenta, totál parteria sira-ne’ebé servisu iha Governu hamutuk besik 900 maibé totál graduadu parteria iha Universidade sira iha Timor-Leste hamutuk 2000-resin.
“Balun seidauk hetan servisu no obriga buka atividade seluk hanesan faan sasán iha loja no merkadu. Situasaun ida-ne’e halo ita triste tanba númeru parteria sufisiente ona, maibé problema prinsipál mak kolokasaun seidauk kompletu no la tuir nesesidade povu nian,” nia dehan.
Antes ne’e, Diretór Servisu Saúde Munisípiu Ermera, António de Fatima, informa profisional saúde sira-ne’ebé mak rekruta iha tinan 2025, dauaun ne’e hamutuk 23 ne’ebé tuir formasaun iha HNGV no iha fulan-Maiu ne’e koloka ona ba iha Munisípiu Servisu Saúde Ermera.
“Husi 23 ne’e médiku na’in-lima (5), parteira na’in-ualu (8), infermeiru na’in-neen (6), nutrisaun na’in-rua (2) no saúde públika na’in-rua (2). Sira-ne’e ita koloka hotu ona bazeia ba mapeamentu ne’ebé mak iha nomós bazeia ba nesesidade ne’ebé mak munisípiu iha, atu nune’e bele kobre ba fasilidade saúde ne’ebé mak iha Ermera,” António de Fatima hateten.
Nia dehan, kolokasaun ne’ebé mak Ministériu Saúde halo ne’e seidauk sufisiente atu bele kobre iha sentru saúde no postu saúde sira-ne’ebé mak iha Munisípiu Ermera.
Jornalista : Felicidade Ximenes
Editór : Cancio Ximenes
