DILI, 02 Maiu 2026 (TATOLI)-Bankada Konselllu Nasionál Rekonstrusaun Timorense (CNRT), Partidu Demokrátiku (PD) no Kmanek Haburas Unidade Nasionál Timor Oan (KHUNTO) fó votu a favór ba proposta Orsamentu Retifikativu (OR) iha finál globál tanba iha responsabilidade ba povu.
Xefe bankada CNRT, Patrocínio dos Reis Fernandes, hateten fó votu nu’udar responsabilidade no obrigasaun hanesan reprezentante povu atu sustenta Governu nia inisiativa sira hodi responde ba krize mundiál ne’ebé afeta mós país.
“Votu ne’ebé fó, ami reprezenta povu hanesan esperansa ba Governu, hodi hatán ba situasaun ne’ebé povu daudaun ezije”, nia hato’o liuhusi deklarasaun votu iha Parlamentu, ohin.
Nia espera katak Governu ho esforsu halo serbisu hodi kumpre implementasaun medida hitu ne’ebé aprezenta nu’udar prioridade aas liu mak garante seguransa enerjétika no seguransa alimentár
Iha fatin hanesan, Xefe Bankada Partidu Demokrátiku (PD), Manuel Henrique Noronha, hateten ida-ne’e hatudu responsabilidade no iha sensibilidade polítika, sosiál no ekonómika ba gravidade konstelasaun jeopolítika ne’ebé fó impaktu ba país. Tanba ne’e, medida sira ne’ebé Governu aprezenta importante tebes.
PD hato’o apresiasaun ba bankada opozisaun sira ne’ebé hato’o hanoin no krítika durante diskusaun. “No fó konfiansa no esperansa tomak ba Governu Dasiak ne’ebé lidera husi Primeiru-Ministru, Kay Rala Xanana Gusmão”, nia hateten.
Xefe Bankada KHUNTO, António Verdial de Sousa, konsidera katak OR la’ós dokumentu tékniku, maibé kontratu sosiál entre povu ho Governu. Bankada fó votu a favór tanba ho konfiansa no responsabilidade ba nasaun no ba povu.
Deputada husi Partidu Libertasaun Nasionál (PLP), Ermenegilda da Costa Laurentina, hateten OR ida-ne’e hodi atende xoke esterna no situasaun sira iha rai-laran, maibé la’ós ba povu rihun-ba rihun ne’ebé afeta husii alargamentu estrada, eviksaun, no despeju administrativu ho meiu injustisa seluk ne’ebé interrompe vida populasaun sira-nian.
Xefe Bankada Frente Revolusionária Timor-Leste Independente (FRETILIN), Aniceto Guterres, hateten bankada vota abstensaun tanba medida sira ne’ebé Governu aprezenta iha OR sei la mitiga risku ne’ebé Timor-Leste ho nia povu hasoru daudaun no iha futuru.
Nia dehan vota abstensaun tanba falta transparénsia iha ezekusaun antesipada ba medida sira ne’e, liuliu iha negosiasaun no halo kontratu sosa rezerva kombustivel, kustu ne’ebé Governu hasai iha diskripánsia ne’ebé boot.
“Vota abstensaun ho sentidu responsabilidade, katak medida no kustu sira ne’ebé foti presiza iha transparénsia no tenke responde ho forma integrada no ba tempu naruk hodi hasoru konsekuénsia husi xoke sira husi li’ur”, afirma.
FRETILIN nia pozisaun nafatin nakloke ba diálogu hodi harii entendimentu katak presiza foti medida foun atu prepara Timor-Leste hasoru dezafiu oioin.
“Ita presiza diskute no buka dalan hamutuk atu prepara-an ba krize ida agora no sira ne’ebé sei mai. Timor-Leste presiza harii entendimentu ba kauza sira ne’ebé halo ita vulneravel no urjente atu muda ita-nia polítika no planu nasionál sira”, hateten.
Hodi rekomenda katak presiza hahú ho medida sira hanesan investimentu ba tranzisaun enerjia husi fonte naun renovavel ba fonte renovavel, harii kapasidade no infraestrutura ba rezerva nasionál hodi proteje ekonomia país no populasaun, hasa’e investimentu iha produsaun ai-han, prioritiza investimentu kapitál umanu no hetan dalan ba hari sustentabilidae fiskál.
Parlamentu Nasionál, liuhusi reuniaun plenária, tersa ne’e, aprova proposta Orsamentu Retifikativu (OR) ho montante millaun $192 iha finál globál ho votu a favór 42, kontra 0 no abstensaun 23 husi FRETILIN no PLP.
Notísia relevante: Parlamentu aprova proposta Orsamentu Retifikafivu iha finál globál
Jornalista: Nelson de Sousa
Editora: Maria Auxiliadora
