DILI, 03 Juñu 2026 (TATOLI)—Komandu Polísia Nasionál Timor-Leste (PNTL) Munisípiu Dili komprometidu fó seguransa másimu ba atividade Semana Oseánia no Kopa Mundiál.
Segundu Komandante PNTL Munisípiu Dili, Superintendente Polísia Luís da Silva, hateten, kona-ba Semana Oseania hahú kedan iha Sesta (05/06) no sei la’o semana tomak, nune’e Komandu PNTL prepara ona nia planu operasaun ida-ne’ebé mak kualidade, Komandu hatun nia membru sira koloka iha fatin ne’ebé determina ona molok atividade ne’e hala’o to’o ramata.
“Komandu hatun ona nia membru sira tantu nia operasionál nomós parte tránzitu oinsá mak atu taka dalan no loke dalan, ida-ne’e ita orienta no planu kompletu atu fó apoiu ba seguransa ba atividade hirak ne’e,” Komandante PNTL Munisípiu Dili hateten ba Jornalista sira iha Eskola Nobel da Pás, Kintál Boot, Kuarta ne’e.
Notísia relevante : Komandu PNTL diskute planu operasaun ba vizita Amu Papa
Membru Polísia mós sei fó seguransa másimu durante realizasaun Kopa Mundiál 2027, liliu ba adeptu sira la’o karavana.
“Atividade ne’e bele la’o, maibé hotu-hotu tenke hakruk ba kódigu estrada, karik iha kanu racing la uza kapasete ne’e Polísia sei halo atuasaun,” nia akresenta.
Komandante dehan, ema hotu iha direitu atu halo karavana, maibé tenke kumpre ba regra sira.
“Ita bele halo atividade pawai maibé lei la hateten katak o halo pawai para o labele uza kapasete no la uza kanu racing ne’e laiha, entaun Polísia sentidu firme nafatin, sé de’it mak kontra kódigu estrada no halo krime, Polísia prontu halo nia atuasaun,” nia katak.
Jornalista : Natalino Costa
Editora : Julia Chatarina
