OEKUSI, 22 Juñu 2026 (TATOLI) – Implementasaun Programa Nasionál Dezenvolvimentu Suku (PNDS) ba suku 20 iha Rejiaun Administrativa Espesiál Oekusi Ambeno (RAEOA), atinje ona 10%.
Bazeia ba Dekretu-Lei Nu. 8/2013 (ne’ebé kria Dekretu-Lei PNDS) no ninia alterasaun sira, programa ne’e bazeia ba dezenvolvimentu ne’ebé dirijidu husi komunidade (Community-Driven Development), ho objetivu atu hametin kapasidade planeamentu no jestaun finanseira iha nível báziku.
“Projetu PNDS tinan ne’e Oekusi iha 23 ba suku 20, maioria la’o ona, nia progresu serbisu 10% ona, maibé nia ezekusaun maka ita seidauk la’o, tanba kompañia sira barak mak hatuun ona materiál seidauk submete resibu atu halo pagamentu bazeia progresu serbisu, no fundu operasaun ita la’o ona tuir serbisu ne’ebé iha,” Diretór PNDS Oekusi, João Bobo hateten ba jornalista sira iha Oekusi, ohin.
Nia esplika, projetu 23 ne’e, hatuur fatuk-inan dezde fulan-Maiu 2026, ne’ebé prioridade liu maka estrada, kanalizasaun bee-moos no kapela no tuir matadalan PNDS nian, katak projetu hirak-ne’e nia durasaun serbisu loron 120, tenke finaliza, no implementasaun maka Ekipa Jestaun Suku (EJS) no PNDS fasilita de’it.
“Projetu 22 ne’e, balun reabilitasaun estrada, edifikasaun kapela, estensaun saladeaula no kanalizasaun bee-moos, maibé maioria estrada no edifikasaun kapela, tanba tuir matadalan PNDS, projetu hirak-ne’e, komunidade sira mak propoin rasik prioridade projetu iha suku, PNDS fasilita de’it,” nia afirma.
Notísia relevante: https://tatoli.tl/2022/02/19/pnds-inisia-altera-dekretu-lei-numeru-8-203-tanba-atividade-aumenta/
Diretór PNDS Oekusi ne’e informa, implementasaun ba projetu 23 ne’e, nia baze orsamentu rihun $931,000,00, ba suku 20 inklui suku foun Monemeko no Kutete. Projetu 23 ne’e, iha suku rua mak prioridade suku Usitaku ho Bene-Ufe hetan projetu rua, tanba tuir kalkulasaun tékniku katak sira-nia kritéria orsamentu boot, entaun fahe ba rua.
Fiskalizasaun komunitária iha terrenu
Iha fatin seluk, Xefe Suku Costa, Francisco Colo, informa, projetu PDNS tinan ne’e, suku hothotu kuaze hetan ona, tanba ne’e nia espera ekipa PNDS kontinua halo monitorizasaun atu obra sira bele konstrui ho kualidade.
“Tinan ne’e suku Costa prioriza estrada rabat betun iha bairru Kruz liga ba estrada ba Bolkenat, ida-ne’e rekomendasaun husi Konsellu-Suku Costa, ami hahú ona iha semana kotuk, hamutuk ho tékniku sira husi PNDS, ha’u mak lorloron iha terrenu, tanba obra sira-ne’e ita tenke tau matan, selae ohin halo semana oin aat ona, ne’e mak ha’u lorloron iha fatin projetu, tanba estrada ne’e desde uluk tama to’o projetu ZEESM mós la konsege halo maske iha vila laran, ne’e mak foin daudaun ita tau ba prioridade,, tanba tempu udan rai-tahu maka’as,” nia hateten.
Notísia relevante:Projetu PNDS 2026, RAEOA hatuur ona fatuk-inan iha Pante Makasar
Jornalista: Abílio Elo Nini
Editór: Rafael Ximenes de A. Belo
