BAUKAU, 25 Juñu 2026 (TATOLI)—Estrada diresuan rotunda Vila Antiga, Suku Bahú ba Suku Kaibada to’o Kaisidu, Suku Tirilolo, Postu Administrativu Baukau Vila sei reabilita iha tempu besik.
Prezidente Autoridade Munisipiu Baucau, Veneranda Lemos, esplika responsavel ba projetu referidu maihusi Kompañia rua hanesan JOVA Construction Unipessoal, Lda no Planaltu STAR Unipessoal, Lda ne’ebé sei reabilita estrada nu’udár parte kontinuasaun husi estrada Kaisidu ba Kaibada to’o rotunda Vila Antiga, Suku Bahú no husi área Lesi liga bá estrada nasionál Triloka.
“Kompañia sira ohin mai informa prosesu administrativa dokumentu nian kompleta hotu ona iha nasionál. Reabilitasaun estrada ne’e kontinuasaun estrada Kaisidu nian ho totál kilómetru 11,” Prezidente Autoridade Munisipál Baukau hateten iha ninia kna’ar fatin, Vila Nova, Kinta ne’e.
Eis deputada ne’e relata projetu ne’e ho distánsia kilómetru 11 kompostu rotunda Vila Antiga ba Kaibada to’o junta ho estrada Kaisidu ho totál kilómetru 9 no kilómetru rua seluk kontinua junta estrada Kaisidu ba knua Kaburenu ne’ebé junta estrada nasionál Triloka.
Projetu ne’e mós nu’udár parte kontinuasaun husi estrada ne’ebé reabilita ona husi diresaun Kairavela to’o Lanud iha-ne’ebé ramata ona selebra kontratu liuhusi Ministériu Planeamentu Investimentu Estratejiku (MPIE) no tuir planu hahú iha inísiu fulan-oin.
Veneranda garante kompañia sei finaliza projetu tuir kontratu maibé husu komunidade atu koopera liuliu iha área Suku Kaibada nune’e bainhira ramata fasilita komunidade asesu ba merkadu, saúde no edukasaun.
Entretantu, projetu estrada diresaun rotunda Vila Nova to’o Kaisidu no Kaisidu bá Triloka, Postu Administrativu Baukau Vila hamutuk kilometru 11 ne’ebé responsabiliza husi JOVA no Planaltu STAR, ho durasaun tinan-ida ho orsamentu purvolta millaun $6.
Jornalista: Natalino Belo
Editór: Xisto Freitas da Piedade
