DILI, 25 Juñu 2026 (TATOLI)—Tenente Jenerál Lere Anan Timur, hateten Antigu Prezidente Repúblika, Francisco Guterres Lú Olo, merese haloot iha Proklamadór Francisco Xavier do Amaral nia sorin iha Jardín Eroi Metinaru.
“Governu no Estadu deside Saudozu Francisco Guterres Lú Olo ba haloot iha Metinaru iha fatin nivel ne’ebé aas, haloot besik Saudozu Francisco Xavier no Saudozu Ma’Huno iha Metinaru nia sorin, ha’u hanoin ida-ne’e justu,” Lere Anan Timur hateten ba jornalista sira iha Rezidénsia Faról, Kinta ne’e.
Nia esplika katak Lú Olo merese haloot iha Proklamadór Francisco Xavier nia sorin tanba aleinde hanesan kuadru no líder rezisténsia durante tinan 24 iha ai-laran, nia mós hanesan eis Prezidente Asembleia Konstituinte, eis Prezidente Parlamentu Nasionál no eis Prezidente Repúblika.
Maibé, Lere dehan katak aban bainnrua nia mós hakotu-iis karik, prefere haloot nia iha Iliomár tanba kultura, lisan mo família iha-ne’ebá.
“Ami ne’ebé sei moris ne’e, ami mate ne’e ema maka deside, maibé ha’u hateten ha’u mate la hakohi ha’u iha Metinaru. Ha’u mate lori ha’u bá hakohi iha Iliomár. Imi (jornalista) testemuña hotu banhira ha’u mate karik avó Lere antes ne’e deklara ona katak nia mate ba hakohi iha Iliomár,” nia haktuir.
Jornalista: Osória Marques
Editór: Xisto Freitas da Piedade
