DILI, 03 Jullu 2026 (TATOLI) – Kooperativa Kafé Timór (CCT, sigla portugés) prepara atu esporta kafé kontentór rua ho tonelada 38 bá Nova Zelándia iha fulan ida-ne’e, maski produsaun kafé tinan ne’e tun kompara ho tinan kotuk.
Prezidente CCT, Mário Soares, hateten tanba produsaun menus, CCT estima sei esporta kafé kontentór sanulu ho tonelada 190 tuir demanda iha merkadu internasionál.
“Iha fulan ne’e, ita sei esporta uluk kontentór rua ho totál tonelada 38 bá Nova Zelándia. Amérika mós husu ona, maibé ita seidauk bele haruka tanba kafé kulit seidauk maran”, Prezidente CCT Mário Soares hateten ba Tatoli ohin.
Maski produsaun tun, nia dehan CCT nafatin sosa no halibur kafé husi komunidade kafekultór sira atu resonde ba pedidu husi merkadu sira.
Tuir nia, volume esportasaun kafé kada tinan depende ba produsaun kafé. Bainhira produsaun sa’e, volume esortasaun mós aumenta, maibé bainhira tun, kuantidade kafé ne’ebé esporta mós menus.
Mário Saore hateten katak nasaun sira ne’ebé durante ne’e importa kafé husi Timór mak Amérika, Austrália, Nova Zelándia, Japaun, Austrália no Xina.
“Kada tinan antes ita haruka bá tenke halo auditoria, nune’e bele hetan sertifikadu orgániku. Atu hetan sertifikadu ne’e ita konvida Control Union mai halo audit hahú husi kolleta to’o tama iha kontentór laran hafoin ida-ne’e sira fó sertifikadu orgániku”, nia dehan.
Jerente CCT, Felisberto Pereira, hateten Contol Union finaliza ona auditoria entre loron 15 no 30 Maiu tinan-ne’e. Agora, CCT hein de’it de’it prosesu esportasaun tanba sertifikadu orgániku ne’e válidu ba tinan ida.
Dadus CCT hatudu katak iha 2025 esporta ona kafé hamutuk tonelada 1.600 bá nasaun lima mak Estadu Unida Amérika, Nova Zelándia, Xina, Japaun no Austrália. Husi merkadu sira ne’e, Amérika sai destinasaun boot liuhusi kompradór Starbucks Coffee Company no Royal Coffee.
Notísia relevante: CCT esporta ona kafé tonelada 1.600 bá nasaun lima
Jornalista: Arminda Fonseca
Editora: Maria Auxiliadora
