DILI, 14 Jullu 2026 (TATOLI) — Prezidente Partidu Demokrátiku (PD), Vise-Primeiru-Ministru, Ministru Koordenadór ba Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, prepara ona kandidatu atu substitui Ministru Ensinu Superiór Siénsia no Kultura (MESSK) ba Primeiru-Ministru, Kay Rala Xanana Gusmão.
Notísia Relevante: Parlamentu aprova votu pezár ba falesimentu Ministru José Honório
“Ministériu Ensinu Superiór Siénsia no Kultura (MESSK) la’o di’ak no servisu la’o di’ak hela, maske ita presiza duni figura ida ne’ebé atu tau iha ne’e,” Assanami hateten ba jornalista sira ilha Sentru Konvensaun Dili (CCD, sigla portugés) iha Kaikoli, ohin.
Vise-Primeiru-Ministru dehan, agora daudaun sira iha ona figura na’in hira kedas maibé depois mak sei haree hodi hato’o ba Primieru Ministru, Kay Rala Xanana Gusmão atu haree, hafoin aprezenta ba Prezidénsia Repúblika mak hili no fó pose.
“Loos duni, antes ne’e, ita hein Primieru-Ministru fila husi nasaun Rúsia ho Portugál mak atu aprezenta, maibé momentu ne’ebá ha’u mak hala’o viajen fali ba rai-li’ur, ne’ebé la konsege aprezenta lista kandidatura,” nia dehan.
Maske nune’e, nia dehan, servisu iha ensinu superiór la’o di’ak hela no laiha problema maibé presiza de’it atu substitui figura ida hodi hala’o servisu no dezenvolve funsaun ho di’ak liután.
“Iha tempu badak, ami sei haruka figura husi PD ba Primeiru-Ministru atu haree no submete ba Prezidente Repúblika hodi fó pose,” nia hateten.
Antes ne’e, nia informa, figura potensiál iha partidu Demokrátiku (PD) ne’e barak tebes ne’ebé iha kapasidade atu asume kna’ar iha MESSK mak hanesan antigu Reitór Universidade Nasionál Timor Lorosa’e (UNTL), João Martins, Reitór Universidade da Páz (UNPAZ), Adolmando Soares Amaral, Reitor Institute of Business (IOB), Pedro Barreto Ximenes, Prezidente CPN-PD, Adriano do Nascimento “Loromau”, Embaixadora Extraordinária Timor- Leste iha Béljika, Maria Lourdes Bessa, ne’ebé uluk mós asume kargu hanesan Ministra Edukasaun.
Aleinde ne’e, antigu deputada Teresa Maria Carvalho, Xefe Kaza Sivíl, Henriqueta Maria da Silva, antigun konselleiru sira, Sekretáriu-Jerál PD, António da Conceição “Kalohan”, figura balun husi Munisípiu Likisá, inklui antigu titular sira-ne’ebé uluk asume kna’ar hanesan Ministru Komérsiu no Indústria no Ministru Edukasaun.
Notísia Relevante: “Ministru José Honório to’o iha HNGV ho kondisaun iis laiha ona”
Jornalista : Alexandra da Costa
Editór : Cancio Ximenes
