OEKUSI, 14 Jullu 2026 (TATOLI) – Diretór Diresaun Rejionál Serbisu Agrikultura iha Rejiaun Administrativa Espesiál Oekusi Ambeno (RAEOA), José Oqui, planeia sei tau prioridade ba fundu kombustível tratór sira-nian iha Planu Asaun Anuál (PAA) ba Orsamentu Jerál Estadu (OJE) tinan-2027.
“Tinan barak ona, ita-nia mákina tratór sira la iha kombustível atu fila rai gratuita ba agrikultór sira, entaun bainhira agriklutór sira presiza atu fila rai tantu to’os no natar, sira tenke responsabiliza gazoél ka gazoliña, Govenu fasilita de’it mákina no tratorista, ne’ebé ita tau ona ba planu, tinan oin ita sei prevee ketak nia fundu ba konbustível utiliza ba tratór de’it,” nia hateten iha Oekusi, ohin.
José Oqui fundamenta, antes ne’e dirijente sira iha Diresaun Rejionál Agrikultura aprezenta ona kestaun ne’e iha reuniaun membru Autoridade RAEOA. Sira mós informa ona asuntu ne’e ba Prezidente Autoridade hodi koordena ho Ministériu Agrikultura, Pekuária, Peska no Floresta (MAPPF), ho objetivu atu apoia RAEOA ho gazoél no gazoliña, nune’e bele fó asisténsia gratuita ba komunidade agrikultór sira-nia natar no to’os.
“Durante ne’e ita uza polítika ida-ne’e de’it, Governu prepara tratór ho tratorista de’it, mina tanba ita-nia tratór sira-ne’ebé kondisaun di’ak hamutuk 13, tékniku sira bele hala’o atividade, maibé agrikultór sira maka tenke enxe mina ba mákina tratór sira ne’e,” nia afirma.
Notísia relevante:Agrikultór Oekusi atu fila rai maibé falta tratorista, Autoridade lokál preokupa
Ezekutivu ne’e hateten, desizaun ne’e mós sei aplika ba mákina kolleta hare ne’ebé antes ne’e oferese husi MAPPF. Bainhira agrikultór sira presiza, sira tenke submete pedidu ne’ebé hetan koñesimentu husi autoridade lokál sira.
“Ne’ebé, durante prosesu fila rai ka kolleta hare, laiha kobransa ruma ba agrikultór sira, tanba tratorista sira funsionáriu, ida-ne’e mós ita esplika kedas ba inan-aman sira, karik tékniku balun husu osan ruma, presiza informa ba diresaun,” nia hateten.
Iha fatin hanesan, Pontu Fokál iha Diresaun Rejionál Serbisu Agrikultura Oekusi, Brito de Araújo, rekoñese katak durante tinan barak ona atividade tratorista nian hetan preokupasaun husi agrikultór sira, maske munisípiu seluk implementa ona kona-ba fila rai gratuita.
“Foin dadaun ami deskuti ona, atu prevee osan ba mina tratór sira, nune’e ba fila rai karik, gratuita ba Agrikultor sira, ne’ebe iha tinan ida ne’e, ne’ebé istimansaun osan ne’ebe atu preve ba mina trator sira ba tinan oin, kuaze rihun $65, nune’e bele responde agrikultór sira ho gratuita”, nia informa.
Notísia relevante:RAEOA lansa Programa Fila-rai iha suku neen
Jornalista: Abílio Elo Nini
Editór: Rafael Ximenes de A. Belo
