Afetadu alargamentu estrada Tasi-Tolu prontu sai, “Governu tenke selu indemnizasaun”
DILI, 12 Outubru 2026 (TATOLI) – Uma-kain hamutuk 102 ne’ebé afetadu husi projetu alargamentu estrada iha Aldeia 12 Outubru, Bairru Danau III, Tasi-Tolu, husu Governu, liuhusi Ministériu Obra Públika (MOP), atu aselera prosesu selu indemnizasaun, hodi nune’e sira bele buka fatin seluk atu hela.
Porta-voz Bairu Danau III, João Bosco, hateten katak MOP iha semana kotuk iha loron 09 Outubru 2026 aviza ona uma-kain 102 ne’e atu husik hela fatin iha loron 16 S’abadu oin ne’ebé sei uza ba projetu alargamentu estrada husi Aldeia 12 Outubru to’o Estátua João Paulo II. Maibé, to’o agora, sira seidauk simu indemnizasaun.
“Ami rekoñese katak rai ne’ebé ami okupa ne’e Estadu nian no ami prontu atu kontribui ba dezenvolvimentu nasionál, inklui husik fatin ba konstrusaun estrada. Maibé, Governu tenke selu indemnizasaun ba uma ne’ebé ami harii ho ami-nia osan rasik,” João Bosco hateten ba TATOLI iha Bairo Danau III, Tasi-Tolu, Segunda-feira ne’e.
Aprezenta ona dokumentu
Nia esplika katak uma-kain sira aprezenta ona dokumentu, inklui kartaun eleitorál, semana rua liubá. Maski nune’e, to’o agora sira seidauk hetan informasaun kona-ba prosesu tuirmai atu aprezenta konta bankária hodi fasilita transferénsia osan indemnizasaun nian.
Tanba ne’e, sira kontinua husu MOP atu aselera prosesu indemnizasaun, atu nune’e sira bele prepara an ba muda fatin no evita difikuldade iha prosesu sai husi fatin ne’ebé afetadu.
La iha osan selu karreta
Iha fatin hanesan, vitima despeju administrativu Rosalina da Costa mós konfirma katak ekipa husi MOP mai ona fó avizu no halibur kartaun eleitorál husi uma-kain ida-idak. Tuir nia, autoridade sira fó tempu to’o semana ida ba komunidade atu husik fatin, no aviza katak, se la kumpre, mákina mak sei mai sobu uma sira.
“Ami prontu atu sai, maibé ami la iha osan atu selu karreta hodi lori ami-nia sasán ba fatin seluk. Tanba ne’e, ami husu MOP atu aselera lalais prosesu indemnizasaun ba uma sira, atu ami bele buka fatin seluk no kontinua buka moris,” Rosalina da Costa dehan.
Tuir observasaun iha terrenu, marka tinta mean ona iha uma sira ne’ebé afetadu husi projetu ne’e. Uma-kain balu mós hahú sobu sira-nia uma ho inisiativa rasik, molok Governu hala’o prosesu despeju administrativu.
Projetu alargamentu estrada ne’e husi Danau III to’o Estátua João Paulo II, tuir informasaun ne’ebé disponível, estrada ne’e hala’o husi kompañia Bandido Kualidade.
Jornalista: Camilio de Sousa
Editór: Rafael Ximenes de A. Belo
