CDTL – UNS asina MoU dezenvolve formasaun treinadór iha Timor-Leste
DILI, 16 Outubru 2026 (TATOLI) – Konfederasaun Desportu Timor-Leste (CDTL) no Universidade Negeri Surabaya (UNS), Indonézia, iha sesta ne’e asina Nota de Intendimentu (MoU) atu hametin kooperasaun iha área formasaun Coaching ka treinamentu desportu, inklui apoiu tékniku no teóriku ba treinadór sira iha Timor-Leste no estudante sira iha Departamentu Desportu, Universidade Nasionál Timor Lorosa’e (UNTL).
Asinatura akordu ne’e hala’o iha edifísiu CDTL, Kolmera, Dili, ho objetivu atu hasa’e kapasidade no kualidade treinadór sira nian liuhusi formasaun teórika no prátika, hodi prepara treinadór profisionál ba modalidade desportiva oioin iha nasaun ne’e.
Prezidente CDTL, Afranio Xavier Amaral, hateten katak akordu ne’e importante tebes atu responde ba nesesidade formasaun treinadór desportu nian iha Timor-Leste.
“Ho naran CDTL, ami agradese ba Universidade Negeri Surabaya, Indonézia, ba kooperasaun ida ne’e. Formasaun coaching iha Timor-Leste sei menus tebes. Tanba ne’e, liuhusi asinatura Nota de Intendimento ne’e, parte rua sei servisu hamutuk atu dezenvolve kapasidade treinadór sira-nian, hodi sai profisionál liután iha futuru,” Afranio dehan ba TATOLI iha edifísiu CDTL, Dili.
Prezidente ne’e esplika katak CDTL sei organiza no mobiliza federasaun ka entidade desportiva sira iha Timor-Leste atu partisipa iha programa formasaun ne’e, ne’ebé sei fasilita husi Universidade Negeri Surabaya.
Tuir Afranio, kooperasaun ne’e sei hala’o durante tinan tolu hahu husi 2026 -2029. Iha períodu ne’e, CDTL sei servisu hamutuk ho universidade ne’e atu asegura katak treinadór husi modalidade desportiva oioin, inklui estudante sira iha Departamentu Desportu UNTL, iha oportunidade atu tuir formasaun no hasa’e sira-nia kapasidade profisionál.
Nia subliña katak treinadór sira ne’ebé hetan formasaun sei iha preparasaun di’ak liután atu fó treinamentu ba atleta sira iha modalidade desportiva ida-idak.
Papél importante
Iha seremónia ne’ebé hanesan, dosente iha área Sport Coaching Universidade Negeri Surabaya, Prof. Dr. Nurkholis, M.Pd., ne’ebé reprezenta universidade ne’e, hateten katak formasaun treinadór iha papél importante atu dezenvolve desportu iha nasaun ida, inklui Timor-Leste.
“Desportu atu dezenvolve tenke iha treinadór ne’ebé iha kapasidade. Ami sei fó apoiu liuhusi formasaun teórika no téknika kona-ba coaching, atu CDTL no membru sira bele aprende no hasa’e sira-nia koñesimentu, hodi fó treinamentu profisionál ba atleta sira,” Nurkholis dehan.
Ajuda dezenvolvimentu desportu
Nia mós enfatiza katak kombinasaun entre koñesimentu teóriku no prátika iha área coaching importante atu hasa’e kualidade treinamentu, hametin konfiansa atleta sira-nian no ajuda dezenvolvimentu desportu iha Timor-Leste.
Kooperasaun ne’e hein katak bele sai pasu importante ida atu hametin kapasidade rekursu umanu iha setór desportu, liuliu iha formasaun treinadór profisionál ne’ebé bele kontribui ba dezenvolvimentu atleta no modalidade desportiva sira iha Timor-Leste.
Notísia relevante:TL Partisipa semináriu ASEAN-Japan Kona-ba Treinadór Desportivu iha Malázia
Jornalista: Camilio de Sousa
Editór: Rafael Ximenes de A. Belo
