Enkontru anuál KAATL: Hametin koñesimentu no kontribui ba dezenvolvimentu nasionál
DILI, 16 Outubru 2026 (TATOLI) – Asosiasaun Alumni KOICA Timor-Leste (KAATL) organiza Enkontru Jerál Anuál iha Timor Lodge Hotel, Komoro, Dili, iha Sesta ne’e, hodi hametin koñesimentu, haforsa kooperasaun no kontribui ba dezenvolvimentu nasionál.
Enkontru ne’e partisipa husi Embaixadór Repúblika Korea iha Timor-Leste, CHANG Hayeon, reprezentante Ajénsia Kooperasaun Internasionál Korea (KOICA), Asesór Prinsipál husi Eletrisidade Timor-Leste (EDTL), Marito Fereira, nu’udar reprezentante Governu Timor-Leste, membru KAATL no konvidadu sira seluk.
Reprezentante Governu Timor-Leste nian, Marito Fereira, hato’o agradese ba Governu Repúblika Korea, KOICA no KAATL tanba sira-nia kontribuisaun iha dezenvolvimentu rekursu umanu no haforsa kooperasaun entre nasaun rua.
Prezidente KAATL, Delio da Costa, iha nia intervensaun, hateten katak enkontru jerál anuál ne’e importante atu membru sira bele fahe informasaun, koñesimentu no esperiénsia ba malu, hodi hametin kooperasaun no kontribui ba dezenvolvimentu nasionál.
Iha parte seluk, Embaixadór Repúblika Korea iha Timor-Leste, CHANG Hayeon, hato’o parabéns ba KAATL tanba konsege organiza enkontru jerál anuál ne’e, no hato’o apresiasaun ba membru sira ne’ebé servisu maka’as atu hala’o atividade ne’e.
Nia mós fó boas-vindas ba alumni foun sira ne’ebé ramata ona programa bolsa estudu KOICA nian iha 2025 no agora tama nu’udar membru KAATL.
Notísia relevante:KAATL apoia materiál dezinfeta ba Grupu ‘Mama Bolu’
“Programa bolsa estudu KOICA nian la’ós de’it oportunidade ba alumni sira atu aprende kona-ba teknolojia no aumenta koñesimentu, maibé mós atu troka esperiénsia no kultura entre Timor-Leste no Repúblika Korea,’’ nia hateten.
Nia hatutan katak liuhusi KAATL, amizade no ligasaun entre alumni sira bele sai metin liután, maski sira tuir programa formasaun iha períodu diferente.
Kria rezultadu
Tanba ne’e, nia apela ba alumni sira atu fahe koñesimentu no esperiénsia ne’ebé sira hetan ba kolega sira no komunidade lokál, hodi kria rezultadu ne’ebé bele fó benefísiu ba ema barak.
Embaixadór ne’e mós refere ba Semináriu Fahe Koñesimentu ne’ebé hala’o iha fulan-Maiu liubá nu’udar ezemplu ida husi esforsu atu aplika no fahe koñesimentu ne’ebé alumni sira hetan durante formasaun.
Diplomata koreanu enkoraja alumni sira atu kontinua implementa koñesimentu iha sira-nia fatin servisu, fahe esperiénsia ho ema seluk no kontribui ba dezenvolvimentu Timor-Leste.
Aleinde ne’e, CHANG Hayeon subliña katak alumni KOICA sira iha knaar importante nu’udar ponte ligasaun entre povu Korea no Timor-Leste, liuhusi haforsa komprensaun, amizade no kooperasaun entre nasaun rua.
Nia asegura katak Governu Repúblika Korea sei kontinua fó atensaun no apoiu liuhusi KOICA, hodi hametin kooperasaun bilaterál no promove dezenvolvimentu sustentavel iha Timor-Leste.
Jornalista : Camilio de Sousa
Editór: Rafael Ximenes de A. Belo
