DILI, 08 juñu 2021 (TATOLI)-Koordenadór Gabinete Zona Ekonomia Espesiál Sosiál Merkadu (ZEESM), Nilton Pereira ho ekipa, distribui foos ba Atoni-oan sira ne’ebé hela iha Dili tuir pedidu ne’ebé sira hato’o ba Prezidente Autoridade Rejiaun Administrativa Espesiál Oé-Cusse Ambeno (PA-RAEOA).
Notísia Relevante : Ekipa RAEOA-CIGC sei koordena transporta Atoni-oan fazeadamente bá Oé-cusse
Governu aplika serka sanitária no konfinamentu obrigatóriu iha Kapitál Dili, nune’e halo komunidade susar tebes atu asesu ba ai-han, nune’e Atoni-oan iha Dili pedidu ba PA-RAEOA no PA-RAOA rasik hato’o fali karta ofisiál ba Governu Sentrál ho apoiu foos ba Atoni-oan ne’ebé hela iha Dili.
“Horiseik, Governu Sentrál liuhosi Ministériu Solidariedade, Sosiál no Inkluzaun (MSSI) lori foos saka 559 mai armazén ZEESM, Farol, Dili, entaun ami haree ba lista estudante no komunidade Atoni-oan ne’ebé iha Dili, ohin, ekipa ZEESM hahú distribuisaun dahuluk ba ema na’in-140 iha Fatuhada, maibé tanba ami fahe loro-kraik entaun ohin foin fahe ba ema na’in 41 no seluk aban mak kontinua fahe fali,” Nilton Pereira informa ba Agência Tatoli liuhosi telefónika, tersa ne’e.
Nia hatutan, maneira fahe mak, estudante no komunidade Atoni-oan ne’ebé iha Dili hela kost hotu-hotu sei hetan, no kada ema ida sei hetan foos saka ida no ba oin mak estudante no Atoni-oan sira presiza tan mak ekipa ZEESM kontinua apoiu nafatin sira.
Iha sorin, estudante Atoni-oan, João Baptista, ne’ebé simu apoiu foos hosi ZEESM konfirma ba Agência Tatoli via telefónika, katak nia parte kontente tanba iha situasaun difisil ida PA-RAEOA la taka matan ba Atoni-oan sira daudaun ne’e hela iha Dili.
“Ami husu nafatin ba PA-RAEOA, katak hahán, ami hetan ona, maibé oinsá ho kost ne’ebé ami hela, daudaun ne’e ami osan laiha atu selu, tanba ne’e ami husu maske ami hetan ona hahán, maibé haree mós esforsu nune’e ami bele fila-fali ba RAEOA, tanba ami osan laiha atu selu uma ne’ebé ami aluga hela ba iha Dili,” João Baptista hateten.
Jornalista : Arminda Fonseca
Editór : Francisco Simões
