DILI, 02 fevereiru 2022 (TATOLI) – Servisu Saúde Munisípiu Bobonaro rejista kazu konfirmadu COVID-19 ida iha loron tersa ne’e no oras ne’e tama ona faze rekuperasaun.
Diretór Servisu saúde munisípiu Bobonaro, João Barreto Cardoso, esplika, pasiente mane ida ho idade 18 ne’e hosi aldeia Ti-matan, suku Ritabou, postu administrativu Maliana, munisípiu Bobonaro konfirmadu pozitivu Covid-19 no enfrenta mós moras dengue.
Servisu Saúde deteta bainhira sidadaun ne’e konsulta saúde iha sentru saúde Maliana segunda ne’e.
“Ita rejista tán kazu pozitivu Covid-19 foun ida, nia mai ho sintoma dengue, depois nia mai halo konsulta iha Ritabou, ao mesmo dengue mós nune’e rezultadu horisehik hatudu pozitivu tán,” nia ko’alia iha Soso, Maliana, kuarta ne’e.
Responsável saúde munisipál ne’e hatutan, sidadaun ne’e kumpre hela retensaun temporária iha sala izolamentu Hospital Referál Maliana (HRM) no daudaun ne’e kondisaun sidadaun ne’e iha faze rekuperasaun.
Maske iha ona faze rekuperasaun maibé ekipa vijilánsia Covid-19 munisípiu Bobonaro sei ba halo restreiu ho família sira-ne’ebé halo kontaktu besik ho sidadaun ne’e, nune’e Covid-19 labele alastra ba komunidade sira seluk iha suku ne’e.
Iha munisípiu ne’e la rejista kazu pozitivu barak, maibe diretor ne’e nafatin apela ba komunidade liu iha postu administrativu Maliana Vila, atu nafatin kumpre medida prevensaun Covid-19 hanesan, uza máskara, fase liman beibeik ho sabaun no kontinua prátika distansiamentu sosiál.
“Ita-nia estadu emerjénsia termina ona, maibe Governu fo hanoin ita-nia Organizasaun Mundiál Saúde fó hanoin nafatin halo medida simples sira, tanba dadaun ne’e variante Omicrom ne’e sai ameasa boot ba mundu,” nia apela.
Notísia relevante: COVID-19: kazu pozitivu foun 31 no ativu 268
Jornalista : Sérgio da Cruz
Editór : Evaristo Soares Martins
