DILI, 29 maret 2022 (TATOLI)—Governu Timor-Leste liuhosi Sekretaria Estadu Formasaun Profisionál no Empregu (SEFOPE) sei implementa Eskema Programa Mobilidade Laborál Pasífiku Austrália (PALM Scheme, sigla inglés) atu integra programa The Pacific Labour Scheme (PLS) no Seasonal Worker Programme (SWP) sai ida de’it.
Antes ne’e, Ministra Negósiu Estranjeiru no Kooperasaun (MNEK), Adaljiza Magno no nini amólogu, Ministra Negósiu Estranjeiru Austrália Marise Payne, asina akordu kona-ba PALM Scheme, iha Canberra, Darwin, Austrália iha loron 10 fevereiru 2022.
“Tuir planu ita sei aplika programa ne’e hahú hosi 04 abríl ba oin, ba traballadór Timor-Leste sira ne’ebé sei bá serbisu iha Austrália hotu,” Diretór Jerál SEFOPE, Paulo Alves hateten, iha salaun Diresaun Nasionál Empregu Exteriór (DNEEE) SEFOPE, Becora, tersa ne’e.
Notísia relevante: SEFOPE despede traballadór timor-oan na’in-69 desloka aban bá Austrália
Programa ne’e sei integra hotu programa rua, ne’ebé kandidatu traballadór sira ne’ebé naran antes ne’e iha PLS ka SWP ne’e sei tama automátika ba sistema PALM no programa ne’e sei fó traballadór sira ba serbisu ho durasaun fulan-sia to’o tinan-tolu.
“Ita-nia traballadór sira-nia naran automátikamente sei tama PALM hotu ba sai ida de’it, tanba antes ne’e traballadór timor-oan ba serbisu liuhosi programa rua ne’e,” nia dehan.
PALM Scheme hanesan programa ne’ebé permite empreza Austrália ne’ebé eleijivél kontrata traballadór sira hosi illa pasífiku sia inklui Timor-Leste, ne’ebé tama kategoria nasaun menus kampu traballu ba traballadór sira.
Jornalista : Arminda Fonseca
Editora : Julia Chatarina
