BAUCAU, 04 marsu 2022 (TATOLI) – Uniaun Nasionál Juventude Maubere (UNIJMA)/ Ativista Pro Repúblika Demokrátika Timor-Leste (RDTL), CPD-RDTL/FRETILIN Movimentu Setór II Funu Nafatin, deside apoia kandidatu Prezidente Repúblika, Francisco Guterres ‘Lú Olo’ iha eleisaun prezidensiál volta daruak períodu 2022-2027.
CPD-RDTL nafatin konsidera kandidatura na’in-rua nu’udar jerasaun FRETILIN hanesan kandidatu Prezidente Repúblika númeru sorteiu 1, José Ramos Horta nu’udar jerasaun dahuluk no Francisco Guterres ‘Lú Olo’ nu’udar jerasaun daruak nune’e UNIJMA rasik sei nafatin hatuur kandidatu na’in-rua iha idak-idak nia fatin tuir kapasidade no esperiénsia rasik.
“Agora mai sei vota no tuba bandeira FRETILIN hodi lori Francisco Guterres ‘Lú Olo’ ba mandatu daruak atu kompleta misaun hodi konsolida RDTL, kore akordu Sofa ne’ebé kesi-metin RDTL,” Koordenadór CPD-RDTL Setór II Funu nafatin, Francisco Loy Sahe informa liuhosi konferénsia imprensa iha Vila Nova, segunda ne’e.
Tuir nia, bainhira Francisco Guterres ‘Lu Olo’ re-eleitu sei asegura estadu RDTL nu’udar país naun-aliadu no hametin pás iha mundu, hadi’a justisa hodi asegura povu nia direitu, kombate korrupsaun no lori progresu dezenvolvimentu ba povu maubere nia moris di’ak.
CPD-RDTL mós alerta ba líder, intelektuál ne’ebé apoia kandidatu na’in-rua atu labele fó atensaun de’it ba situasaun rai-laran maibé fó importánsia ba situasaun perigoza ne’ebé mundu internasionál hasoru.
Jornalista : Natalino Belo
Editór : Evaristo Soares Martins
