DILI, 20 jullu 2022 (TATOLI)—Diretór Ezekutivu Servisu Verifikasaun Emprezariál, Institutu Públiku (SERVE, I.P), Florêncio da Costa Sanches, hateten, fulan-agostu ne’e sei halo rejistu móvel ba empreza sira iha territóriu laran tomak ne’ebé seidauk rejistu.
“Fulan oin ita sei halo lansamentu móvel rejistu ba empreza sira iha munisípiu Bobonaro ho objetivu ita hakbesik ba komunidade ne’ebé durante ne’e hakarak halo atividade negósiu atu rejistu iha SERVE, I.P maibé tanba distánisa dook, entaun ita buka sira halo rejistu, nune’e sira livre hala’o atividade,” Diretór informa ba Agência Tatoli iha ninia knaar fatin, Hudi-Laran, kuarta ne’e.
Notísia relevante: SERVE, I.P rejista ajénsia viajen hamutuk 170
Nia dehan, SERVE, I.P inisia atividade ne’e tanba komunidade maioria hela iha área rurál, nune’e atu mai vila la’o kilómetru 20 to’o 45, entaun Servisu Rejistrasaun mak tun hodi fasilita komunidade.
Bainhira negosiante hala’o atividade negósiu maibé la rejistu maka bele hetan multa tanba viola dekretu-lei SERVE, I.P, ne’ebé deteta halo verifikasaun ba atividade fíziku no arkivu elektróniku, entidade sira viola lei númeru 10/2017 kona-ba sosiedade komunikasaun, dekretu-lei númeru 16/2017 kona-ba rejistu komeriál no dekretu-lei 34/2017 kona-ba lisensiamentu atividade ekonómiku.
“Ita-nia objetivu prinsipál hala’o atividade rejistu móvel tanba daudaun ne’e ita-nia Governu iha polítika programa Cesta Bázika, entaun bainhira empreza sira rejistu hotu, sira bele asesu ba programa Cesta Bázika no bele asesu mós ba programa kréditu ho alokasaun miliaun $50 ne’ebé Governu aprova ona no tau iha Banku Nasionál Komérsiu Timor-Leste (NBCTL, sigla portugés),” nia tenik.
SERVE, I.P hala’o atividade rejistrasaun serbisu hamutuk ho Kámara Komérsiu Indústria Timor-Leste (CCI-TL).
“Orsamentu ne’ebé ita prepara ne’e tama iha bens no servisu ho montante $100.000,” Diretór salienta.
Jornalista : Arminda Fonseca
Editora : Julia Chatarina
