DILI, 21 jullu 2022 (TATOLI)–Ajénsia Nasionál Avaliasaun Akreditasaun Akadémiku (ANAAA) ezekuta ona Orsamentu Jerál Estadu (OJE) 2022 iha trimestrál daruak (abril-juñu) hamutuk 30%, ekivalente ho osan $111.284.
“Iha tinan 2022 ne’e, ami hetan alokasaun Orsamentu Jerál Estadu hamutuk $368.416. Hosi totál orsamentu ne’e, ami konsege halo ona despeza atuál hamutuk 30% ekivalente $111.284,” Diretór ezekutivu, Edmundo Viegas, informa iha edifísiu ANAAA, Balide, kinta ne’e.
Osan ne’e gasta ona to’o loron 05 jullu 2022, ho nune’e orsamentu ne’ebé sei iha hela kompromisu hamutuk $ 103.080, portantu ANAAA sei aselera ezekusaun.
“Ami-nia ezekusaun konta hosi ida ne’ebé ami gasta ona hamutuk ho kompromisu atinje ona 58% no metade hosi balansu ne’e kuaze 42% ne’ebé ekivalente ba osan hamutuk $154.051,” nia akresenta.
Notísia relevante: ANAAA lansa avaliasaun kursu iha instituisaun hitu
Normalmente ezekusaun ANAAA kada tinan sempre sa’e hahú terseiru trimestrál, tanba agora ANAAA tenke halo despeza hodi selu avaliadór nasionál no internasionál atu apoiu avaliasaun ba kursu no instituisaun sira.
“Ami hahú selu ona avaliadór sira tanba avaliasaun loloos sei hahú hosi terseiru trimestrál. tanba hosi primeiru no segundu trimestrál ne’e ami aproveita tempu hodi halo de’it preparasaun ba programa estudu ka kursu sira inklui mós ba Instituisaun sira,” nia tenik.
Tama terseiru trimestrál ne’e ANAAA hahú halo ona despeza maka’as tanba tenke hasai ona osan hodi selu avaliadór nasionál 30 no internasionál 10 resin atu halo preparasaun ba avaliasaun sira, ho nune’e ANAAA konsege halo ona formasaun ba sira iha semana liubá hahú hosi loron 08 to’o 09 jullu.
Enkuantu, avaliador internasionál sira ne’e kompostu hosi nasaun haat mak hanesan Indonézia, Malázia, Filipina no Australia hamutuk ho timoroan na’in-30 sei hahú avaliasaun iha segunda agora no sei finaliza iha outubru to’o novembru tinan ida-ne’e
Jornalista : Tomé Amado
Editora : Julia Chatarina
