VIQUEQUE, 20 agostu 2022 (TATOLI)—Prezidente Konsellu Veteranu Munisípiu Viqueque, Adriano Camara ‘Lentil’ husu ba FALINTIL-Forsa Defeza Timor-Leste (F-FDTL) tenke banati nafatin tuir ezérsitu FALINTIL rezisténsia tinan 1975 nian.
“Ami veteranu hosi munisípiu Viqueque, loron FALINTIL sai hanesan loron ne’ebé importante ba forsa armada nian iha tempu uluk loron 20 agostu 1975. Forsa armada portugés ninia mosu iha loron 25 abril ne’ebé Timor-Leste hamosu forsa FALINTIL ne’ebé harii hosi FRETILIN, nune’e iha momentu ne’ebá sira kontra golpe hasoru partidu UDT. Tanba partidu UDT defende prinsípiu Portugal ne’ebé hakarak utiliza sistema Governu Portugal, monta iha Timor-Leste tanba ida-ne’e FRETILIN lakoi harii forsa FALINTIL hakarak sai ezérsitu Timor-Leste hodi hamriik mesak,” Veteranu Lentil hateten ba Agência Tatoli, iha ámbitu komemorasaun loron Forsa Armada Libertasaun Nasionál (FALINTIL) ba da-47, iha Viqueque vila, sábadu ne’e.
Notísia relevante: Komemorasaun loron FALINTIL atu dignifika eroi fó vida ba luta libertasaun
Nia dehan, iha loron 20 agostu, Timor-Leste hatutan hodi sai hanesan memóri ida ba funu libertasaun tanba ezersitu portugés nakfilak ba ezersitu timor-oan nian sai forsa FALINTIL.
“Iha momentu ne’ebá, Forsa UDT domina territóriu Timor-Leste laran, maibé mosu golpe forsa FALINTIL kaptura hotu líder UDT sira no duni sai forsa UDT hosi fronteira ne’ebé halai hotu ba Nusa Tenggara Timur (NTT). Durante fulan-tolu ezérsitu FALINTIL kontrola tomak iha Timor-Leste tinan 1975. Ha’u-nia mensajen ba forsa agora ne’e mai hosi terus no susar ninia ne’ebé tenke banati tuir ezersitu uluk nian, tenke sakrifika,” akresenta.
Nune’e, nia husu instituisaun F-FDTL ba oin tenke envolve nafatin veteranu sira-nia oan tanba iha veteranu maka nasaun Timor-Leste iha.
“Bainhira laiha veteranu, nasaun Timor-Leste mós laiha, tanba ne’e jerasaun hosi veteranu sira tenke envolve iha F-FDTL. Uluk sira-nia aman terus ba rai ida-ne’e no haluha sira-nia vida, haluha sira-nia inan-aman no haluha fe’en ho oan sira. Ba moris mesak ai-laran, han mós la hatane, maka ohin loron ita harii nasaun soberania Timor-Leste. Tanba ne’e veteranu sira-nia oan iha diretu tama iha F-FDTL,” nia tenik.
Jornalista : Vitorino Lopes da Costa
Editora : Julia Chatarina
