DILI, 24 setembru 2022 (TATOLI)-Prezidente Repúblika (PR), José Manuel Ramos Horta, sesta ne’e, hala’o enkontru bilaterál ho Primeiru-Ministru Kambodia, Hun Sen, iha Sede Organizasaun Nasaun Unida (ONU) nian iha Nova Iorke, hafoin partisipa iha asembleia jerál ONU ba dala-77.
Enkontru ne’e partisipa hosi Ministra Negósiu Estranjeiru no Kooperasaun (MNEK), Adaljiza Magno no Embaixadór Timor-Leste ba Nova Iorke, Carlito Nunes, hodi diskute kona-ba kooperasaun iha área oinoin.
Iha diskursu iha Asembleia Jerál ONU ba dala-77, Primeiru-Ministru Kambodia, Hun Sen deklara, kambodia apoia tomak adezaun Timor-Leste bá organizasaun Association South East Asia Nation (ASEAN), hodi sai membru ba dala-11 iha tinan 2023.
“Ha’u hakarak informa iha reuniaun ida-ne’e katak, susesu ASEAN mak koordena atu simu Timor-Leste ba membru ASEAN ba dala-11, hanesan saida mak Prezidente Timor-Leste hateten, atu sai membru ASEAN, no hein katak, iha finál tinan ida-ne’e no tinan oin, Timor-Leste sei membru ASEAN ba dala-11 hamutuk ne’ebé iha populasaun millaun 600. Ha’u-nia obrigadu ba Prezidente Timor-Leste ne’ebé mak mai rona ha’u-nia diskursu, no espera katak Timor-Leste bele sai hanesan membru,” Primeiru-Ministru Kambodia hateten, liuhosi hosi komunikadu imprensa ne’ebé Agência TATOLI asesu hosi Palásiu Prezidensiál, sábadu ne’e.
Hun Sen subliña, Kambodia esforsu hela atu atende objetivu komún hodi lori benefísiu ba komunidade rejionál, bazea ba espíritu sentralidade, unidade no solidariedade.
Durante diskursu iha Assembleia Jerál ONU, Prezidente Repúblika José Ramos-Horta hein katak, iha tinan oin, Timor-Leste bele asesu ba Organizasaun Mundiál Komérsiu no ASEAN hodi apoia interese nasaun nian, hanesan reforma ekonómika doméstika, interese nasionál no diversifikasaun ekonómika.
Ba Xefe Estadu, adezaun Timor-Leste ba ASEAN hanesan polítika estratéjika ba estabilidade no prosperiedade.
“Adezaun ba ASEAN hanesan estratéjia imperativa, importante iha estabilidade no prosperiedade iha Timor-Leste, waihira iha pás no prosperiedade iha Timor-Leste, importante mós ba ASEAN. Pás no prosperiedade iha ita-nia nasaun viziña benefísia ita hotu. Konflitu ka ameasa no risku hosi nasaun ida, inevitavelmente sei fó mos impaktu ba nasaun seluk,” Xefe Estadu afirma
Jornalista: Nelson de Sousa
Editór: Evaristo Soares Martins
