DILI, 24 outubru 2022 (TATOLI)—Ministériu Turizmu Komérsiu no Indústria (MTKI), segunda ne’e, atualiza servisu ministériu ba Primeiru-Ministru (PM), Taur Matan Ruak.
“Relasiona ho Timor-Leste nia partisipasaun iha Expo Osaka, ohin ita hato’o ba Primeiru-Ministru, katak daudaun ita iha ámbitu haruka Diretór Jerál MTKI durante loron-rua hodi partisipa enkontru preparasaun Expo Osaka iha Tókiu ne’ebé sei realiza iha tinan 2025, Timor-Leste mós sei partisipa,” Ministru Turizmu Komérsiu no Indústria, José Lucas do Carmo da Silva, informa hafoin hasoru malu ho PM, iha Palásiu Governu, segunda ne’e.
Notísia relevante: Timor-Leste tama lista fa’an produtu iha Pos-Expo Dubai
Nia dehan, parte ministériu daudaun hein bainhira Diretór Jerál fila mai, mak sei lori rezultadu atu nune’e bele hatene parte Timor-Leste sei halo preparasaun saida iha espozaisaun ne’e rasik no bele lori ba Konselu Ministru hodi hetan aprovasaun.
“Ita fó hatene ba Primeiru-Ministru katak bainhira ekipa fila hosi Tókiu mai, iha tempu badak ministériu sei lori programa ida-ne’e, atu estabelese autoridade ida hanesan uluk ita halo ba Expo Dubai, maski Expo Osaka rasik sei akontese iha tinan 2025,” nia tenik.
Jornalista : Arminda Fonseca
Editora : Julia Chatarina
