DILI, 04 novembru 2022 (TATOLI)—Governu liuhosi reuniaun Konsellu Ministru (KM) estraordinária, sesta ne’e, asiste aprezentasaun Ministru Prezidénsia Konsellu Ministru, Fidelis Manuel Leite Magalhães, kona-ba inisiativa atu harii Institutu Públiku ba Millennium Challenge Account-Timor-Leste (MCA-TL).
“Ha’u rasik aprezenta opsaun polítika-lejizlativa sira ne’ebé sai hanesan baze ba inisiativa atu harii Institutu Públiku Millennium Challenge Account-Timor-Leste,” Ministru Fidelis, relata hafoin reuniaun ezekutivu, iha Palásiu Governu.
Institutu Públiku ne’ e sei funsiona hanesan instrumentu implementasaun finansiamentu ne’ebé sei fó hosi ajénsia governamentál Millennium Challenge Corporation (MCC), tuir akordu kompaktu ne’ebé asina ona iha loron 19 jullu liubá no sai hanesan responsável ba jestaun finansiamentu no ba koordenasaun hosi implementasaun ne’ebé atu promove liuhosi entidade nasionál sira.
“Implementasaun projetu ne’e sei sai hanesan responsabilidade Governu liuhosi entidade nasionál sira tuir ida-idak ninia kompeténsia,” nia akresenta.
Notísia relevante: PN ratifika akordu kompaktu MCC
Konsellu Administrasaun MCC iha dezembru 2017, hili ona Timor-Leste, nu’udár nasaun ne’ebé kumpre rekizitu hodi implementa programa kompaktu ba promosaun kreximentu ekonómiku, ne’ebé aliña ho prioridade dezenvolvimentu nasionál.
Ministru Fidelis no Vise-Prezidente Adjuntu MCC nian, Jonathan Brooks, asina ona akordu finansiamentu inisiál ida iha loron 21 jullu 2018, ho valór $750.000 hodi kria ekipa ne’ebé integra iha programa MCC, ho misaun atu identifika setór ekonómiku sira ne’ebé sei dezenvolve durante implementasaun programa ne’e.
Ekipa Dezenvolvimentu Kompaktu ba Dezenvolvimentu Governu Timor-Leste (CDT-TL) ida-ne’e ofisiálmente kria ona iha loron 25 marsu 2019 no lidera hosi Embaixadór, Constâncio Pinto.
Hosi loron 11 to’o 17 abril 2022, Ministru Fidelis lidera delegasaun altu nível, ne’ebé kompostu hosi reprezentante 14 hosi entidade governamentál oioin hodi halo viajen ba Estadu Unidu Amérika (EUA) hodi halo negosiasaun akordu kompaktu ho MCC.
Antes ne’e, tuir konkordánsia MCC disponibiliza millaun $420 no Governu Timor-Leste kontribui ho millaun $64, nune’e valór ne’ebé disponibiliza hosi Timor-Leste sei aloka de’it ba projetu tratamentu bee, ezgotu no drenajen no hosi osan millaun $34 sei uza hodi halo ligasaun ba uma sira no hodi dezativa fosa ne’ebé iha, restante millaun $30 sei utiliza hodi apoia instalasaun sistema konvensionál no ba instalasaun bomba bee nian.
Iha loron 03 outubru 2022, Parlamentu Nasionál ratifika akordu kompaktu MCC.
Jornalista : Antónia Gusmão
Editora : Julia Chatarina
