DILI, 30 dezembru 2022 (TATOLI)—Diretór Nasionál Asisténsia Sosiál (DNSA), Lucas Tois, hateten karreta funeráriu lima ne’ebé Governu liuhosi Ministériu Solidariedade Sosiál no Inkluzaun (MSSI) sosa ne’e sei reforsa iha nasionál hodi tula mate-isin iha nasionál ba munisípiu.
“Karreta funeráriu lima ne’ebé iha MSSI ne’e sei reforsa karreta seluk hodi halo movimentu ka tula ema mate iha nasionál ba munisípiu sira,” Lucas Tois hateten ba Agência Tatoli, liuhosi telefónika, sesta ne’e.
Karreta funeráriu lima ne’e, daudaun ne’e iha hela MSSI no hein kompleta dokumentu karreta nian hafoin bele halo movimentu iha nasionál ba munisípiu sira hotu.
“Ita sei trata hela karreta lima ne’e nia dokumentu. Bainhira loos hotu ona mak ita sei entrega ba departamentu funeráriu iha Bemori hodi halo ajuda no tula mate-isin iha ospitál ba munisípiu sira,” nia esplika.
Karreta funerária lima to’o iha Timor-Leste iha domingu (18/12) tinan 2022.
Osan ne’ebé mak sosa karreta funeráriu lima (5) ne’e hamutuk rihun $200-resin no kada karreta sei kona rihun $47.
Daudaun ne’e, MSSI iha karreta funeráriu 40-resin, ne’ebé iha Dili karreta funeráriu 13 ba atendimentu públiku no ida ba ema importante (VIP, sigla inglés) no kada munisipiu inklui Rejiaun Administrativu Espesiál Oé-Cusse Ambeno (RAEOA) iha karreta rua (2) ne’ebé Governu sosa ona iha 2009 no 2013.
Notísia Relevante: Karreta funeráriu lima sei to’o Timor-Leste iha dezembru
Jornalista : Osoria Marques
Editór : Cancio Ximenes
