BOBONARO, 31 janeiru 2023 (TATOLI) – Polísia Nasionál Timor-Leste (PNTL) Munisípiu Bobonaro, tersa ne’e entrega motorizada tipu (KLX) hamutuk unidade tolu ba xefe Polísia Komunitária (POLKOM) no Ofisiál Polísia Suku (OPS) foun na’in-rua iha postu administrativu Lolotoe.
Komandante Polísia Munisípiu Bobonaro, Superintendente Antoninho Mauluta, esplika motorizada ne’e apoia hosi Ministériu Intérior distribui liuhosi komandu jerál Polísia Nasionál Timor-Leste.
Notísia relevante: Komandu PNTL entrega motorizada ba komandante eskuadra hitu iha Covalima
“Ohin ita distribui motorizada tolu, rua ba OPS no ida ba xefe POLKOM komandu munisípiu atubele kontrola situasaun tuir informasaun iha OPS balu maka sira serbisu ladún di’ak no la ativu, ita sei orienta nia bá to’o direta iha suku ne’e lori haree no nia mós sei la’o hamutuk ho estrutura KRAM nian atubele liga ho grupu arte-marsiál sira hotu,” nia informa ba jornalista sira, iha Maliana.
Enkuantu membru OPS na’in-rua ne’ebé komandu nomea ba suku rua iha postu administrativu Lolotoe tanba membru sira antes ne’e hetan ona tranferénsia direta mai hosi komandu jerál ba fali munisípiu seluk.
“Ita komesa prepara fali membru na’in-rua, hosi komandu liuliu hosi Task Force rasik, ita nomea sira na’in-rua koloka ba fatin rua ne’ebé antes ne’e mamuk hela,” Mauluta katak.
Komandante Mauluta dehan, motorizada ne’e komandu jerál apoia atu fasilita no mellora serbisu komandante eskuadra sira ho nia adjuntu inklui OPS balun hodi responde ba nesesidade komunidade inklui atende ba situasaun balun.
“Sira mós atu utiliza ba situasaun ne’ebé oras ne’e ita prepara ba kampaña no eleisaun parlamentár mai oin, ita orienta ba sira katak uza tuir regra ho normal. Ita uza tenke bazea ba orden serbisu bazea ba situasaun,” nia apela.
Enkuantu tinan ne’e komandu Polísia Munisípiu Bobonaro hetan distribuisaun motirizada hamutuk 10, tanba antes ne’e iha unidade hitu entrega ona ba komandante eskuadra neen no ida iha postu polísia Batugade.
Notísia relevante: Padre Valerio Gusmão fó bensaun ba karreta 14 iha PNTL Bobonaro
Jornalista : Sérgio da Cruz
Editór : Evaristo Soares Martins
