DILI, 08 fevereiru 2023 (TATOLI)—Sekretária Estadu Formasaun Profisionál no Empregu (SEFOPE), liuhosi Diresaun Nasional Empregu Exteriór (DNEE), kuarta ne’e, despede tan traballadór hamutuk 63 atu servisu iha Korea Súl.
Sekretáriu Estadu Formasaun Profesional no Empregu, Alarico de Rosario, husu traballadór sira ne’ebé hetan ona oportunidade ba servisu iha Korea Súl atu respeita ema nia lei, servisu hatudu komportamentu di’ak no labele halai ses hosi sistema, nune’e bele hetan nafatin konfiansa hosi empregadór sira.
“Ita-nia polítika mak haruka joven sira ba servisu iha rai-liur maibé responsabilidade imi nia mak tenke respreita regra sira ne’ebé iha. Tanba imi ba la’os de’it atu manan ema nia osan, maibé atu hetan mós esperénsia foun hosi ema nia rai hodi nune’e fila mai bele dezenvolve ita-nia rai sai hanesan nasaun sira seluk ne’ebé dezenvolvidu iha mundu,” Alarico de Rosário hateten ba jornalista iha salaun Timor Lodge Comoro, Dili.
Governate ne’e mós husu traballadór 63, bainhira ba servisu iha Korea Súl, tenke haree malu nu’udar maun ho alin, naan ho feton no labele paratika filafali artemarsiál no arterituál iha ema nia rai nune’e, bele hamorin nafatin Timor-Leste nia-naran iha mundu liuliu nasaun Korea Súl.
Diretór Diresaun Nasionál Empregu Exteriór (DNEE) Filomeno Soares, hateten, serimónia despedida no asina deklarasaun ne’e hanesan konkordánsia ida hosi família traballadór no Governu katak, aseita oan sira atu ba servisu iha Korea Súl la’os Gorvenu maka obriga.
“Nune’e mosu problema ruma parte rua iha responsabilidade hodi rezolve,” nia dehan.
Embaixadór Korea Súl iha Timor-Leste, Shin Mantaek, hateten, Governu Korea Súl kontente simu traballadór timor-oan ba servisu iha Korea Súl, tanba ida ne’e iha ona akordu entre Governu rua ne’e.
“Ha’u husu ba traballadór sira ba servisu iha Korea Súl, kuidadu an no respeita regra sira ne’ebé iha, no kuidadu an tanba klima Korea Súl ho Timor-Leste la hanesan,” nia dehan.
Jornalista : Arminda Fonseca
Editora : Armandina Moniz
