BOBONARO, 23 fevereiru 2023 (TATOLI) – Tuir dadus ne’ebé Sekretariadu Tékniku Administrasaun Eleitorál (STAE) munisípiu Bobonaro, identifika kondisaun estrada liga ba sentru votasaun hamutuk 36 presiza hadi’a nune’e iha eleisaun parlamentál bele fasilita mobilizasaun materiál sensitivu ho la’ós-sensitivu sira.
Diretór STAE munisípiu Bobonaro, Mariano Viegas Amarál, informa tuir dadus númeru ne’e mai hosi postu administrativu Atabae tolu, Balibo haat, Bobonaro 13, Cailaco hitu, Lolotoe lima no postu administratrivu Maliana haat.
Notísia relevante: STAE Bobonaro fó teste eskrita ba kandidatu brigadista 356
“Hau hanoin estrada hamutuk 36, risku ne’e presiza hadi’ak. Ami-nia pedidu iha tiha ona diretór servisu munisipál obra públika kontinua ba Institutu Jestaun Ekipamentu ona karik, tanba horibainrua ami hato’o ami-nia planu operasionál ba prezidente autoridade munisípiu dehan planu ne’e ba ona IGE,” nia aprezenta kestaun ne’e iha reuniaun konselu koordenasaun munisipál Bobonaro faze dahuluk tinan 2023, kinta ne’e.
STAE mós identifika sentru votasaun hamutuk 42 iha munisípiu Bobonaro mak la asesu eletrisidade hanesan postu Atabae iha tolu komposta hosi sede aldeia Lolocolo, Ensinu Públiku Malehan no sede suku Rairobo.
Hosi parte postuBalibo ualu mak hanesan EP Cowa, sede aldeia Badutmean, EP Lalis, EP Railuli, Ensinu Báziku Filiál (EBF) Surilaku, EP Duaderok, EP Rai-Ulun no sede aldeia Ferik-Katuas.
Enkuantu iha postu administratuvu Bobonaro 11 mak hanesan sede aldeia Odelgomo, EP Mazop, sede aldeia Beamoas, sede aldeia Holbese, EBF Holsa Taz, EBF Mabelis, EBF Leber Taz, sede aldeia iha suku Soilesu, sede aldeia ida ho suku Ilat-Laur no EBF Mape-Op.
Hosi postu administrativu Cailaco iha ualu mak hanesan sede aldeia Atudara, sede suku Goulolo, sede suku Genulai, sede aldeia Tatelori, EP Poerema, sede aldeia Aitutu no sede suku Raiheu.
Enkuantu postu administrativu Lolotoe iha neen mak hanesan sede aldeia Oburo, sede aldeia Anon, EBC Guda Taz, EP Atus, EP Saligolo no EP Tepa.
Hosi parte postu administrativu Maliana iha sentru votasaun neen mak la asesu eletrisidade hanesan sede aldeia Raifun Foho, EP Nunutana, sede aldeia Maganutu, EBF Mabil-Oa, EP Saburai no EP Pipgalak foho.
Tanba ne’e iha tempu badak, Diretór Mariano sei koordena ho koordenadór Eletrisidade Timor-leste, Empreza Públika (EDTL,E.P) Munisípiu Bobonaro atu solusiona.
“Sei barak la halimar, tanba foin daudaun iha enkontru liubá dehan menus loos ona, suku rua de’it ahi la tama, maibé até agora ami seidauk hatene, tanba iha Maliana kapitál munisípiu nia mos iha neen kedas mak la asesu eletrisidade, ami kontinua esforsu sé laable liu ita tau osan aluga jeradór bainhira materiál sensitivu to’o ahi tenke lakan, kontajen votu mós ahi tenke lakan,” nia hateten.
Enkuantu sentru votasaun ne’e laiha efisiu públiku ne’ebé presiza loke lona hamutuk 12 mak hanesan iha postu Atabae sede aldei Lolocolo, postu Balibo Sabuleso no sede aldeia Ferik-Katuas.
Postu Bobonaro tolu mak hanesan Eskola Xina Mali-Lait, sede aldeia Oepo no sede aldeia Tuluata, postu Cailaco iha rua mak hanesan sentru votasaun Bilimaui no Raiheu.
Hosi postu administrativu Maliana mk hanesan sede aldeia Lolooa, sentru Don Bosco, sede aldeia Rokon no sede aldeia Galisapulu.
No sentru votasaun ne’e mak uza karregadór ka lalin sasán iha dalan la asesu ba sentru votasaun no estasaunde votu hamutuk 36 kompostu hosi Atabae tolu, Blaibo haat, Bobonaro 13, Cailaco hitu, Lolotoe lima no Maliana haat.
Tuir dadus STAE munisípiu Bobonaro planeia sei establese sentru votasaun 150 no estasaun votu 170, komposta hosi Atabae sentru votasaun 14 no estasaun votu 16, Balibo sentru votasaun 22 no estasaun votu 26.
Nune’e mós Bobonaro sentru votasaun 46 no estasaun votu 50, Cailaco sentru votasaun 17 no estasaun votu 18, Lolotoe iha sentru votasaun 17 no estasaun votu 18 no postu administrativu Maliana iha sentru votasaun 34 no estasaun votu 42.
STAE mós dadaun ne’e halo hela rekurutamentu ba Brigada 150 no tuir planu sei halo rekrutamentu ba ofisiál eleitorál hamutuk 1.700.
Notísia relevante: STAE Bobonaro rejista eleitór foun 450 iha janeiru
Jornalista : Sérgio da Cruz
Editór : Evaristo Soares Martins
