DILI, 27 fevereiru 2023 (TATOLI)—Terseiru Vise Prezidente Partidu Libertasaun Populár (PLP), Maria Angelina Sarmento, informa rezultadu konferénsia nasionál partidu nian iha sábadu (25/02) deside katak PLP sei laiha koligasaun pre-eleitorál iha eleisaun parlamentár 2023, nune’e sei avansa mesak hodi kompete iha prosesu demokrátiku ne’e.
Notísia Relevante: Taur husu kuadru sira servisu makaas fó vitória ba PLP
“Sábadu foin daudaun Partidu Libertasaun Populár (PLP) realiza konferénsia nasionál, ne’ebé kuaze partisipa hosi delegadu kuaze 500 hosi munisípiu 13 no RAEOA, órgaun asosiadu iha partidu laran hamutuk 18 inklui estrutura nasionál partidu nian no Prezidente Partidu Taur Matan Ruak. Rezultadu hosi konferénsia ne’e hamosu rezolusaun haat hanesan ne’e atu óinsa PLP hasoru eleisaun parlamentár 2023, ida mak PLP iha ninia desizaun atu la’o iha eleisaun parlamentár agora, nu’udar partidu polítiku no sei laiha koligasaun pre-eleitorál,” Terseiru Vise PLP, Maria Angelina Sarmento, hateten ba Agência Tatoli iha Parlamentu Nasionál, segunda ne’e.
Maibé, nia dehan, sei mantein nafatin plataforma entedimentu ne’ebé agora la’o hela no ba oin sei iha posibilidade boot atu kontinua la’o ho partidu polítiku ne’ebé mak agora daudaun la’o hamutuk iha plataforma entedimentu ba oitavu Governu konstituisionál.
“Bazea ba informasaun no desizaun tuir konferénsia nasionál foin daudaun, agora ba eleisaun parlamentár Partidu Libertasaun Populár (PLP) prontu atu la’o hanesan partidu polítiku ida. Se deside atu halo koligasaun partidária karik ne’e prazu ba aprezentasaun lista kandidatura bele dehan termina ona, maibé PLP sei la’o hanesan avansa kandidatu úniku ba partidu rasik. Iha posibilidade atu mantein no kontinua plataforma ida-ne’ebé agora la’o hela hodi viabiliza VIII Governu konstituisional no loke dala mós ba partidu sira seluk ne’ebé agora daudaun iha asentu parlamentár ne’ebé mak hakarak mai apoiu tan hodi forma IX Governu,” nia hateten.
Atuál Vise Prezidente Parlamentu Nasionál ne’e la fó sai rezolusaun pontu sira seluk aprova ligadu ho situasaun internál partidu nian.
Enkuantu, iha tempu badak PLP sei ba rejistu iha Tribunál Rekursu (TR) hodi bele kompete iha eleisaun parlamentár ne’ebé sei monu iha loron 21 fulan-maiu tinan 2023.
Jornalista : Nelson de Sousa
Editór : Cancio Ximenes
