OÉ-CUSSE 28 fevereiru 2023 (TATOLI) – Adjuntu Diretór Eskola Bázika Sentrál (EBC, sigla portugés) Boboloa, Firmino Nuno Ulan, husu ba Autoridade komunitáriu iha suku Bobokase, sub-rejiaun Pante Makasar, buka dalan atu kanaliza bee-moos ba eskola hodi fasilita oan sira, bele fase liman no soe bee ho dignu iha eskola.
“Bee-moos iha eskola ne’e ami enfrenta kleur ona, bee laiha, oinsá ita-nia alunu sira fase liman no soe bee ruma, sintina kompletu maibé presiza bee, tanba iha eskola presiza bee-moos, dalaruma ami haruka estudante sira, iha loron sábadu mai eskola tenke lori bee, atu tau iha sintina nune’e bele uza, maibé uza iha loron ida-de’it, tanba estudante barak, ne’e maka ita atu haruka estudante sira loron loron lori bee ladún di’ak,” Adjuntu Diretór EBC Boboloa, Firmino Nuno Ulan, informa ba jornalista sira iha EBC Boboloa suku Bobokase, segunda ne’e.
“Bee iha momentu ne’e SAS dada bee iha komunidade sira maibé tama eskola maka laiha, ami sempre hasoru xefe suku maibé to’o ohin loron mós rezultadu seidauk hatene klaru bainhira mak dada tama mai eskola, atu fasilita oan sira, ne’ebé asuntu ne’e ami relata ba xefe suku,” nia husu.
Nune’e Xefe suku Bobokase, Sebastião Cob, rekoñese no promete iha futuru buka dalan hodi halo kanalizasaun ba eskola, tanba daudaun ne’e sei menus ekipamentu kanalizasaun nian.
“Ha’u mós hatene difikuldade EBC Boboloa durante ne’e hasoru problema bee-moos, maibé iha ha’u-nia planu atu dada, débitu bee la sufisiénte, maibé iha momentu tanba iha PNDS sira iha projetu perfurasaun bee,” nia katak.
Ne’e duni projetu perfurasaun ne’e, atu dada ba bairru Bimelo no kanalizasaun tenki mai direita iha eskola, maibé projetu ida-ne’e, la’o tarde liu maka durante ne’e seidauk halo kanalizasaun ba bairru no ba eskola.
“Maibé karik projetu ne’e seidauk bele halo, entaun ha’u sei koordena ho profesór sira atu dada hosi kanu ida iha sede suku tama ba EBC Boboloa, ne’e iha ona planu, ami mós koordena ona maibé ami sei enfrenta menus fasilidade materiál kona-bá kanalizasaun,” nia hateten.
Entretantu, dadus estudante iha EBC Boboloa iha tinan letivu 2023, primeiru no segundu siklu hamutuk 250 ho profesór na’in-ualu (8) no terseiru siklu hamutuk 245 ho profesór na’in-18 ne’ebé totál jerál estudante iha EBC Boboloa hamutuk 595.
Jornalista: Abílio Elo Nini
Editór: Evaristo Soares Martins
