DILI, 02 marsu 2023 (TATOLI)–Diretór Servisu Edukasaun Munisípiu Dili (DSEMD), Carlito da Silva, konsidera profesór reklamante 235 iha munisípiu Dili ne’ebé la hato’o sira-nia reklamasaun mai SEMD tanba konsidera la prienxe kritériu atu sai profesór kontratadu.
Notísia Relevante: AMN-TL hato’o preokupasaun profesór voluntáriu ba PPN
“Ha’u konsidera ita-nia reklamante sira-ne’ebé mak la mai hato’o reklamasaun ne’e tanba sira hatene-an la prienxe rekezitu ka kritériu ne’ebé Ministériu Edukasaun presiza atu sai profesór kontratadu,” Carlito da Silva hateten ba Agência Tatoli iha nia kna’ar fatin, Comoro, kinta ne’e.
Tuir nia, profesór hamutuk 683 ne’ebé hato’o ona sira-nia reklamasaun mai Dirasaun Servisu Edukasaun Dili ne’e konsidera la’ós hotu-hotu ninia dokumentu kompletu, maibé iha professor balun mós sira-nia dokumentu la kompletu maibé nafatin mai halo reklamasaun.
“Ita mós konsidera katak profesór reklamante sira-ne’ebé mai hato’o ona sira-nia reklamasaun ne’e mós barak mak la prienxe kritériu maibé sira nafatin mai hato’o no submeter reklamasaun,” nia hateten.
Tuir lista profesór voluntáriu iha Munisípiu Dili bazeia ba dadus hosi rekursu umanu identifika katak profesór sira-ne’ebé sira-nia dokumentu hetan ona selesaun hosi ekipa painél juri hamutuk 1.183, hosi rezultadu ne’e hatudu katak profesór na’in-265 de’it mak hetan kontratu no na’in-918 mak la pasa.
Hosi prosesu hato’o reklamasaun durante loron 15 hahú hosi loron 14 to’o 28 ne’e, Servisu Edukasaun Munisípiu Dili konsege rejista reklamante hamutuk na’in-683 mak hato’o sira-nia reklamasaun enkuantu profesór reklamante na’in-235 la hato’o sira-nia reklamasaun.
Profesór na’in-683 ne’ebé hato’o ona sira-nia reklamasaun ne’e kompostu hosi profesór Edukasaun Pre-Eskolár (EPE) na’in-72, Ensinu Báziku Filiál (EBF) na’in-136, Ensinu Báziku Central (EBC) na’in-225, Ensinu Sekundáriu Tékniku Vokasionál (ESTV) na’in-71 no Ensinu Sekundáriu Jerál (ESG) na’in-177.
Notísia Relevante: MEJD sei simu reklamasaun hosi profesór voluntáriu 1.371
Jornalista : Tomé Amado
Editór : Cancio Ximenes
