DILI, 07 marsu 2023 (TATOLI) – Ministru Transporte no Komunikasaun (MTK), José Agustinho da Silva, preokupa ho infraestrutura ba autokarru Damri no Babadok Express ne’ebé sei halo operasaun entre Dili no Kupang-Indonézia.
Governante ne’e dehan simu ona informasaun hosi Diresaun Nasionál Transporte Terrestre (DNTT) atu halo lansamentu ba operasaun Damri no Babadok Express, ne’ebé tuir planu sei halo iha 30 marsu.
“DNTT halo hela preparasaun ba lansamentu konetividade terrestre. Iha Indonézia sira preparadu ein termu infraestrutura, lojístika, maibé ita-nia parte ha’u dehan ba sira [DNTT] atu lansa ne’e lansa saida, tanba akordu ne’e espíritu resiprosidade signifika ema nian mai, ita-nian mós bá. Agora ema nian preparadu atu bá, más ita-nian bá iha ne’ebé?”, Ministru Transporte tenik hafoin reuniaun ho Xefe Governu, iha Palásiu Governu, tersa ne’e.
Governante ne’e mós husu ba empreza Babadok Express katak bainhira mak karreta sira ne’e to’o Dili no sira relata katak sei to’o iha semana ikus fulan-marsu.
“Ne’ebé ha’u dehan ba sira katak bainhira to’o ona Dili ita halo lansamentu, más ha’u mós preokupa ho ita-nia kondisaun infraestrutura tanba fatin sira ne’ebé ema mai tenke para bá ne’e iha hotu ona akordu-laran, pur ezemplu bus ne’e mai para iha Mota-ain, Maubara no to’o iha Dili saida mak ita kria. Keta halo ema to’o mai buka hariis-fatin lahetan, ida ne’e problema”, nia kestiona.
Ba asuntu ne’e, meiu hothotu tenke halo nune’e prienxe rekezitu mínimu hanesan terminál ba autokarru. Daudaun ekipa sira hosi DNTT no Indonézia haree hela hodi kria kondisaun atu fasilita pasajeiru.
Membru 23 husi Asosisaun Emprezariál Feto Timor-Leste (AEMTL) angaria fundu rihun $360 ba sosa autokarru tolu ho modelo Babadok Express. Modelu karreta ne’e tuir padraun europeu, hanesan iha hariis-fatin, kafetaria, wi-fi no espasu ba bagajen sira.
Rekorde katak Sekretáriu Estadu Diresaun-Jerál Transporte Terrestre Indonézia, halo teste operasionál, iha tinan kotuk, ba transporte, inklui autokarru jeridu husi empreza públika DAMRI, ba rota entre Kupang no Dili.
Notísia relevante: 06 marsu 2023, bus Babadok Express sei to’o Timor-Leste
Jornalista: Antónia Gusmão
Editora: Maria Auxiliadora
