DILI, 02 marsu 2023 (TATOLI)—Diretora Empreza Hamutuk Babadok Translog, Ata Sagran, hateten, bus Babadok Express tolu daudaun ne’e tula ona iha roo hosi Xina mai Timor-Leste. Tuir planu bus Babadok Express tolu sei to’o iha loron 06 marsu 2023.
Nia dehan, bainhira bus Babadok Express ne’e to’o mai sei kumpre akordu ne’ebé Governu Timor-Leste ho Indonézia halo. Katak, Babadok Express ho DAMRI sei halo rute, Dili no Kupang Indonézia.
“Maromak tulun, iha loron 06 marsu agora ita-nia bus Babadok Express sei to’o iha Portu Tibar. To’o mai ita sei prepara nia dokumentu no sei rejistu legál operasaun nian iha Diresaun Nasional Transporte Terrestre (DNTT),” Ata Sagran dehan ba Agência Tatoli, iha nia knaar-fatin Acait, Dili, kinta ne’e.
Notisia relevante : 30 marsu lansamentu bus DAMRI, Governu deside billete másimu $45
Kona-ba presu sira-nia parte sei halo diskusaun tanba parte Indonézia nian fó folin tuir fali hanesan bus Timor Travel no Paradise. Ho ida ne’e, parte rua daudaun ne’e sei kontinua diskute mak sei fó sai rezultadu. No rezultadu ne’e bainhira fó sai liuhosu asina dokumentu.
“Ita sei determina presu loloos kona-ba viajen nian atu labele prejudika fali ba empreza sira seluk hotu ne’ebé halo mós viajen terrestre nian. Ita sei prepara nia rezultadu no sei fó sai iha loron 15 marsu. Serimonia asina dokumentu kona-ba presu nian sei halo antes tama ba lansamentu iha loron 30 marsu,” nia dehan.
Antes ne’e, Diretór Diresaun Nasionl Transporte Terreste, António da Costa, hateten,, bus DAMRI ne’e rasik, loloos atu lansa iha 23 dezembru 2022 , maibé Timor-Leste rasik seidauk prontu tanba bus Timor-Leste nian konstrui iha Xina. Ho ida ne’e, tinan ne’e foin halo lansamentu.
António Da Costa, hateten, Billete ba bus DAMRI ne’e rasik, hosi Timor-Leste nian deside folin hahú hosi $40 to’o $45, no hosi Indonézia fó kustu mai hahú hosi, rupiah Rp 250.000 to’o Rp 350.000.
Notisia relevante : Membru AEMTL investe iha transporte fronteira terrestre ho valór $360.000
Kona-ba bus hosi Timor-Leste, sosa hosi membru Asosiasaun Emprezariál Feto Timor-Leste (AEMTL, sigla portugés) hamutuk empreza 21 ne’ebé investe iha Konsórsiu Babadok Translog.
Ba bus ne’e, membru AEMTL investe kada bus ida ho valór $120.000, ne’ebé ba bus tolu hamutuk $360.000.
Jornalista : Arminda Fonseca
Editora : Armandina Moniz
