DILI, 12 abril 2023 (TATOLI)—Ministru Obra Públika (MOP), Abel Pires hateten reabilitasaun estrada urbana postu administrativu Maliana, munisípiu Bobonaro hein de’it vistu hosi Tribunal liuhosi kámara Konta.
“Reabilitasaun estrada urbana Maliana ita hein de’it vistu hosi Tribunal Kámara Konta. Ne’ebé ita hein de’it, iha fulan ne’e ou fulan oin. Ne’ebe maiu 2023 ne’e ita sei halo lansamentu ba estrada refere,” Abel Pires dehan ba jornalista iha Palásiu Governu, Dili kuarta ne’e.
Notisia relevante : Governu sei reabilita estrada Aileu bá Likidoe no iha sidade Maliana
Estrada Urbana Maliana rasik, Komisaun Nasionál Aprovizionamentu (CNA, sigla portugés) fó sai kompañia manán nain iha loron 10 fevereiru 2023 ne’ebé manán hosi kompañia internasionál PT. Hutama Karya (Parsero) Indonézia ho nia montante orsamentu $21.228.762,00.
Antes ne’e, Governu liuhosi reuniaun Konsellu Ministru aprova ona projetu ne’ebe aprezenta hosi Ministru Obra Publika Abel Pires, hodi autoriza prosedimentu aprovizionamentu estrada urbana Maliana pakote I ho valór global ne’ebé estimasaun $16,314.392,06. Enkuantu estrada urbana Maliana pakote II ho estrada prinsipal ne’e ninia estimasaun valor global $23,587 019,36.
Jornalista : Arminda Fonseca
Editora : Armandina Moniz
