DILI, 13 abríl 2023 (TATOLI)–Sekretáriu Estadu Arte no Kultura (SEAK), Teofilo Caldas, hateten iha ona kompañia internasionál ida mak agora prontu atu hahú fali prosesu konstrusaun ba biblioteka nasionál maibé naran kompañia ne’e sei konfidensiál hela.
“Ita iha ona kompañia internasionál ida maka sai fali vensedór iha konkursu públiku ne’e maibé konfidensiál hela bainhira kuandu asina ona kontratu maka ami sei fó sai ba públiku,” Teofilo Caldas hateten iha resintu knua uma lisan Karketu Leo-Besi, Manleuana, Baialeste, kinta ne’e.
Tuir SEAK, konstrusaun biblioteka nasionál ne’ebé VIII Governu Konstitusionál liuhosi Primeiru-Ministru Taur Mata Ruak tau ona fatuk dahuluk no tuir planu loloos ne’e hahú tiha ona iha fulan marsu liu ba, maibé kompañia internasionál ne’ebé sai manán-na’in ne’e hato’o fali ninia pedidu foun ba kustu, entaun tenke submete fali ba ANPM no kompañia ENI tentaun prosesu kontratu ne’e seidauk bele realiza.
Maibé, nia dehan, hosi parte Ministériu Ensinu Superiór Siénsia no Kultura (MESSK) ho Sekretáriu Estadu Arte no Kultura (SEAK) oras ne’e daudaun hala’o hela esforsu ba parte rua ne’ebé importante hosi working group no stering commite ida-idak haree hela ninia servisu, atu aselera prosesu asina kontratu ho kompañia foun ne’e kuandu pedidu kompañia nian hetan ona aseitasaun hosi ANPM.no kompañia ENI hosi Italia.
“Ami fiar katak iha tempu badak working group sira bele aselera lalais prosesu sira atu nune’e bele fó biban ba stering comitee bele foti desizaun ruma,” nia hateten.
Kompañia anterior ne’ebé sai vensedór ne’e retira tiha ninia proposta sira, tanba hosi inísiu nia submete kustu ne’ebé la imajina atu akontese COVID-19 no sasán hotu karun, entaun kustu ne’ebé kompañia retiradu ne’e haree katak labele atu sustenta ka finansia ninia atividade sira entaun nia retira tiha.
Biblioteka nasionál ne’e ninia finansiamentu mai hosi kompañia petróleu Italia naran “ENI” ne’ebé iha 2018 halo esplorasaun mina Kitang iha tasi Timor, kompañia ne’e fó kontribuisaun sosiál ida mai Timor-Leste ho totál orsamentu millaun $10 hahú kedan iha 2008.
Iha prosesu ne’e, Kompañia Petróliu “ENI” ninia responsabilidade mak atu harii biblioteka no prepara ekipamentu ba biblioteka nian no hosi parte Governu Timor-Leste nian responsabilidade mak prepara rai halo formasaun ba funsionáriu sira, fó bolsu estudu no apoiu materiál sira hanesan livru sira.
Jornalista : Tomé Amado
Editór : Cancio Ximenes
