OÉ-CUSSE 13 abríl 2023 (TATOLI) – Komandante Polísia Nasionál Timor-Leste (PNTL), Rejiaun Administrativa Espesiál Oé-Cusse Ambeno (RAEOA), Superintendente Xefe Polísia, Mateus Mendes Assunção, informa, daudaun ne’e estabelese ona ekipa ida hodi kontrola movimentasaun patrimóniu Estadu iha ámbitu kampañia eleitorál no loron eleisaun.
Nune’e, dirijente PNTL ne’e apela ba funsionáriu sira iha Oé-Cusse atu labele uza patrimóniu Estadu tantu motorizada no karreta atu uza hodi hala’o atividade kampaña eleitorál, tanba lei la autoriza sasán Estadu uza ba interese pesoál ka individu.
Notísia relevante: PNTL Oé-Cusse preparadu asegura kampaña no eleisaun parlamentár
“Ha’u atu subliña kona-bá evita krime eleitorál, PNTL preparadu, ha’u iha ekipa ida-ne’ebé foku ba iha krime eleitorál, violasaun ruma iha kampaña eleitorál, ha’u husu ba funsionáriu sira sé mak uza karik patrimóniu Estadu tantu karreta ho motorizada, favór ida labele uza hodi ba halo kampaña, kuandu uza patrimóniu Estadu halo kampaña, ha’u sei halo asaun ida rigorozu,” Mateus Mendes ko’alia iha enseramentu edukasaun sívika hosi CNE ne’ebé hala’o iha aula igreja Numbei, kinta ne’e.
Ekipa PNTL daudaun ne’e estabelese ona ekipa espesiál ida, hodi halo atuasaun ba sirkulasaun patrimóniu Estadu liu oras serbisu iha períodu kampaña eleitorál.
“Ami sei la haree ba partidu ne’e sé, ou ema ne’e sé, PNTL nia misaun mak seguransa nasaun, estabilidade, ha’u husu partidu polítiku, joven sira, inan-aman sira, presiza kumpre, mak ita-boot sira viola sala karik, PNTL sei halo atuasaun ida rigorozu,” nia fó hanoin.
Komandante PNTL ne’e, relembra, iha eleisaun pasadu, situasaun ne’e akontese iha Oé-Cusse, lori sasán Estadu ba tuir kampaña, maibé liuhosi aprosimasaun no kooperasaun PNTL fó fila, ho mansajen tenke kompromete loron seluk labele repete.
“Maibé agora lae, ne’e rigorozu, kaer kona halo apreensaun lori ba tribunál para prosesa, ne’ebé labele tinan-tinan ita hamutuk ko’alia ba malu maibé nafatin akontese, ne’e regra Estadu nian, ne’ebé ita tenke hala’o ho seriedade,” nia afirma.
Komandante PNTL Rejiaun Oé-Cusse ne’e fó hanoin ba líder partidu polítiku sira iha Oé-Cusse, atu kumpre oras kampaña ne’ebé determina ona hahú hosi tuku 08:00 dadeersan tenke remata iha tuku 6:30.
“Ha’u husu mós iha pasadu akontese, regra kampañia ne’e determina ona ninia oras, maibé dalaruma partidu sira hala’o liu tiha oras ne’ebé Governu fó, kuandu CNE ba hase partidu balun ameasa atu halo agresaun fíziku hasoru orgaun eleitorál, ne’e krime, PNTL husu labele akontese tán iha tinan ne’e,” nia apela.
Notísia relevante: PNTL Oé-Cusse realiza simulasaun tátika uza forsa asegura eleisaun parlamentár
Jornalista : Abílio Elo Nini
Editór : Evaristo Soares Martins
