DILI, 18 abríl 2023 (TATOLI)—Fórum Organizasaun Naun Governamentál Timor-Leste (FONGTIL), tersa ne’e, lansa Sentru Informasaun Eleisaun Parlamentár 2023.
“Ohin ita estabelese Sentru Informasaun ba Eleisaun Parlamentár ho objetivu fó espasu ba ami-nia membru no organizasaun sosiedade sivíl tomak bele halo observasaun ba atividade kampaña partidu polítiku no tempu eleisaun,” Diretór Ezekutivu FONGTIL, Valentim da Costa Pinto, hateten, iha salaun FONGTIL, Caicoli.
Razaun estabelese fatin ne’e hodi prinxe atividade diálogu no talk show ne’ebé sei konvida reprezentante hosi partidu polítiku mai ko’alia saida mak sei halo bainhira asume knaar.
Notísia relevante : FONGTIL realiza diálogu hodi introdús polítika esterna Governu ba ONG
Sentru informasaun sei funsiona durante kampaña Eleisaun Parlamentár , ne’ebé sei permite membru sira iha munisípiu no postu administrativu sira halo observasaun ba situasaun hotu no relata mai nasionál.
“Bainhira sira relata mai ami iha nasionál, kada semana sei fó sai informasaun ba públiku kona-ba ami-nia deskobrimentu iha terrenu,” nia akresenta.
Daudaun FONGTIL prepara membru hamutuk 300 resin atu halo observasaun ba kampaña hodi halo monitorizasaun hosi nasionál to’o munisípiu.
Atividade ne’ebé sei realiza iha sentru informasaun ne’e hetan apoiu fundu hosi OXFAM no Servisu Apoiu Sosiedade Sivíl no Auditoria Sosiál (SASCAS, sigla portugés) iha Gabinete Primimeiru Ministru (GPM).
“Ita hetan fundu hosi OXFAM hamutuk $6.000 resin no Servisu Apoiu Sosiedade Sivíl no Auditoria Sosiál rasik $500. Osan sira ne’e ita sei apoiu pontu vogál sira iha terrenu,” nia informa.
Iha fatin hanesan, Diretór Ezekutivu SASCAS iha GPM, Edvin Soares Noronha, hateten, atividade ne’e importante tebes tanba sei apoiu Governu halo observasaun ba kampaña no ElPar.
“Servisu Apoiu Sosiedade Sivíl no Auditoria Sosiál kontinua apoiu sosiedade sivíl sira tanba ami iha papél intermediáriu ba ita-boot sira-nia reklamasaun no rekomendasaun ka hanoin balun ne’ebé presiza lori ba nível altu sira. Nune’e, ami nafatin akompaña imi. Espera katak FONGTIL nia servisu ne’e sei kontribui maka’as ba Sekretariadu Tékniku Administrasaub Eleitorál no Komisaun Nasionál Eleisaun atu bele garantia eleisaun ne’ebé transparánsia, prátiku tuir lei Konstituisaun Repúblika no lei sira seluk ne’ebé hateten kona-ba eleisaun nian,” nia tenik.
Jornalista : Arminda Fonseca
Editora : Julia Chatarina
