DILI, 19 abril 2023 (TATOLI)—Partido Demokratiku (PD), kompremete sei liberta povu husi kiak no mukit, no loke kampo servisu ba joven sira, bainhira manán iha Eleisaun Parlamentar tinan 2023.
“Ha’u husu ba kompañeiros sira, hotu-hotu tenki esforsu, badinas ho nune’e ita hotu servisu ho objektivu ida deit. Ita tenki liberta povu husi kiak, no kria kampo servisu ba joven sira, no povu hotu tenki kontribui ba nia nasaun ida ne’e,” Prezidente Partidu PD, Mariano Assanami Sabino Lopes dehan liu hosi loron kampaña dahuluk ho tipu konferensia da imprensa no zoom meeting iha sede Partido PD, Vera Cruz Dili, kuarta ne’e.
Nia dehan, Timor oan ho ninia kapasidade tenki kontribui ba nasaun ne’e. No Timor oan hotu tenki produktivu iha rai ne’e. “Labele husik nasaun sai katuas. Nasaun ne’e labele husik para dukur, labele husik nasaun para ema temi bebeik nia kiak. Ita iha rikusoin no ita mos lao ho Maromak, tanba ne’e laiha razaun para ita kiak nafatin. Ho ida ne’e, Timor Oan hotu tenke kontribui,” dehan Assanami.
Prezidenti Partidu ne’e dehan tan, PD hamrik atu hametin ukun rasik-an, atu kaer valor demokrasia no tenki sai valor ida ba moris no lisan ba ukun.
Nune’e mos, Sekretariu Jeral PD, Antonio da Conceicão (Kalohan), hateten antes halao kampaña ba dahuluk, militantes no struktura Partidu PD hala’o vizita ba cemiterio Jardim dos Herois, Metinaro.
Nia mos husu ba militantes PD ne’ebe hala’o kampaña iha munisipiu hotu, atu habelar liberdade no justisa hodi nune’e bele hatene esensial husi demokrasia no Liberdade ne’e rasik.
Joranlista : Mirandolina Barros Soares
Editor : Armandina Moniz
